Badira bi hilabete Moskuko Gaztetxea hustuarazi zietela. Bidasoko Gazte Langileen Asanbladak (BIGLA) argi utzi baitzuen urtarrilaren 15ean Eguzkitza kaleko lokala hustutzen ari zirela «ez goaz, bota gaituzte». Joan den urtarrilaren 15ean izandako epaiketaren sententzia jaso aurretik hustu zuten Moskuko Gaztetxea. Proiektua abiatu besterik ez zuten egin, baina egoitzaren giltzak jabeei entregatuz auzibidearen ondorioak arinduko zituztelakoan zeuden.
Izan ere, abenduko okupazioa egin eta gero, bi lagun identifikatu zituen Ertzaintzak. Eta hauei leporatzen zietenagatik isunak ordainduko zituztela aurreikusia zuten. Epaiketa azkarra agindu zieten, baina prokuradore baten faltan hilabete atzeratu zuen epaileak bista judiziala. Horrela, urtarrilaren 15eko epaiketan lokalaren jabea den berogailuen enpresak, okupazioa eman zenean lokala saltzeko kontratu bat negoziatzen ari zela argudiatu zuen. Baita salmenta justifikatzen duten agiriak aurkeztu ere. Horrenbestez, «salmenta oztopatu izana leporatu digute, eta horren ondorioz 120.000 euroko kalteordainak pagatzeko arriskua genuen» azaldu digu asanbladako kide batek.
Haatik, lokala hustu eta giltzak entregatu zituzten, baina espaziotik kanporatzeaz gain, guztira 3.000 euro baino gehiagoko isunak ailegatu zaizkie orain. BIGLAko kideak azaldu digunez, hainbat isun batzen zaieki kopuru horretan, eta «jabetza pribatuaren defentsa itsua eta desmobilizazioa helburu duen errepresioa» salatu nahi dute. Isunen ordainketari aurre egiteko, aldiz, «gazteok saretzen segitzeko elkartasun jaialdia» antolatu dute Lakaxita Gaztetxean apirilaren 5ean.
Elkartasun jaialdia
BIGLAko ordezkariek gogoratzen dutenez, Moskuko Gaztetxearen aurreneko asanbladan Lakaxitako kideak gonbidatu zituzten, eta «Irun txikia denez gazte mugimenduen arteko elkartasunik ez da falta». Jaialdia 19:00etan hasiko da "Okupazioa gaur egungo testuinguru politikoan" izenburupeko hitzaldia batekin. Aurreratu dutenez, Moskuko Gaztetxearen adibidea hartuta, «gaur egun gazteek kapitalismo basatiak agintzen duen aisialdi kontsumistaz harago modu autogestionatu batean oinarritutako proiektuak kudeatzeko okupazioek topatzen dituzten zailtasunak» aztertuko dituzte.
Ondoren afari-merienda egingo dute, eta 20:30etik hasita musika gaualdia izango dute. Sustraisister taldearekin hasiko dira, 22:00etan Landetxako Zarata taldearen kontzertua izango da, eta gero musika eta antzerkia uztartzen dituen Dazanga Show donostiarrak. 01:00etik aurrera Adrienboy, Varillas, Navas eta CZW DJak ariko dira gaua girotzen. Sarrerak 5 euro kostatuko du, eta Bidasoko Gazte Langileen Asanbladak ordaindu beharreko isunari aurre egiteko bideratuko dute.