Osasun Bidasoa plataformak ekainaren 2an Alberto Martinez Osasun sailburuari igorritako eskutitzak ez duela erantzunik jaso salatu dute. Eta osasun zerbitzuek okerrera egiten jarraitzen duten bitartean, maiatzaren 31n Irungo kaleetan manifestaturiko 12.000 herritarrekin errespetu falta iruditzen zaio Bidasoa-Bortziriak eskualdeetako 40 herri eragile biltzen dituen plataformari.
Osasun Bidasoa plataformak arreta pediatrikoak okerrera egiten jarraitzen zuela gogoratu zioten ekainaren 2an igorritako gutun baten bidez Alberto Martinez Osasun sailburuari. Eta irailean sartzera goazen honetan, osasun-agintarien erantzun eza nabarmentzen du plataformak. «Premiazko konponbide bat eskatzeko» Irungo kaleak bete zituzten 12.000 manifestarik joan den maiatzaren 31n, eta «errespetu eta begirune falta» leporatze diote Eusko Jaurlaritzari. Izan ere, hiruhileko oso bat iragan da, eta plataformak dioenez, oraindik ez da betetzen ari anbulatorioetan agindutako pediatria zerbitzuaren ordutegi-luzapena, 17:00ak arte. Gainera, apirilaren 13an Bidasoa ospitaleko larrialdi pediatrikoak eten eta gero, Lehen Arretako zentroetan ez dira ari aurretik eskaintzen zen 8:00etatik 15:00etarako zerbitzua. «Ez dago ia pediatrarik, eta larrialdiak bakarrik artatzen dira, kasu askotan beste zentroetako profesionalen errefortzuen bidez», diote.
Irun Zentroko lehen mailako arretako larrialdietan (EAG), adibidez, ez dago pediatrarik, eta pediatriako erizaintzako errefortzuak ez du lanik egiten, ez larunbatetan, ezta jaiegunetan ere. Plataformak emandako datuen arabera egoerak okerrera egingo du aurki. Izan ere, Irun-Hondarribian, ESI Bidasoan 9 pediatra daude gaur egun, eta horietarik 7k trasladoa eskatu zuten udaberrian lan-karga handia eta lan-baldintza urriak direla eta.
Horrenbestez, eta mobilizatzen jarraitzeko beharra ikusten dutenez, plataformatik Bidasoaldeko haurrek egindako marrazki, ikur eta leloak biltzeko deialdia luzatu berri du, pediatria zerbitzua berriz martxan jar dezaten aldarrikatzeko estrategiaren parte, eta ondoko ekimenetan erabili ahal izateko. Ekimenean parte hartzeko deia luzatu dute, pediatra eskasia eta ospitaleko larrialdi pediatrikoen gabezia irudikatzen duten marrazki, ikur edota esaldi leloak urgenciaspediatricasbidasoa@gmail.com posta elektronikora bidaliz, edo 661 354 192 telefono zenbakira whatsapp bidez ere.
