"Ibaitik itsasora" lelopean, Tutetarik Hendaiarako bidea osatuko dute zenbait euskaldunek irailaren 10etik 20ra. Hamaika etapa eginen dituzte guztira, Nafarroa, Gipuzkoa eta Lapurdi zanpatuz bidean. Helburua bikoitza izanen da: batetik, Palestinari elkartasuna adieraztea, aldi berean Euskal Herriko biztanleak kontzientziatuz eta Israelek Palestinan aitzinera daraman okupazio eta genozidioa salatuz; bertzetik, Euskal Herriko zenbait enpresen eta erakundeen kolaborazioa azaleratzea, zeharka bada ere estatu zapaltzailearekin harremanak dituztenak egon badaudelako.
Tuteran hasiko da, irailaren 10ean, Palestinaren aldeko ibilaldia. Hamaika etapa izanen dituzte aitzinetik, irailaren 20an Hendaiara ailegatu baino lehen. Tartean, Israelek aurrera daraman okupazioa eta genozidioa salatzeko aukera izanen dute partehartzaileek, baita elkartasun keinuak egitekoa ere. Bidean, zenbait geldialdi eginen dituzte tokian tokiko eragileek antolatuko dituzten hitzaldi, dokumental proiekzio edota jarduerez gozatzeko, baina baita enpresa eta erakunde kolaboratzaileen egoitzetan manifestaldiak egiteko ere (hala nola, CAF, MTorres, Osasunbidea, Zara edo Carrefour enpresa eta administrazio publikoen kolaborazioa). Hau guztiaz gain, manifestazio erraldoi bat eginen dute irailaren 14an, martxa Iruñeara ailegatzen den egunean. Ekitaldi desberdinak eginen dira bertan, Palestinaren alde, eta bazkari bat antolatu dute Antsoainen, nahi duen guztiarentzat irekia.
Eskualdetik ere pasatuko da ibilaldia. Irailaren 16an Donezteben geldialdia eginen du martxak eta, orduz geroztik, bukatu bitarte, Bidasoaldeko zenbait herri zanpatuko dituzte partehartzaileek. Doneztebetik Elizondora, Elizondotik Berara, Beratik Irunera eta Irundik Hendaiara izanen dira azken lau etapak. Bertan hainbat ekitaldi prestatzen ari dira, oraindik ere osoki zehaztu gabe daudenak, ibilaldian parte hartu ezin dutenek euren aletxoa jar dezaten elkartasun keinu handi honetan.
Ibilaldia antolatzen ari den Elisa Huartek argitu duenez, informazio guzia euren webgunean eskuragarri egonen da (https://ibaitikitsasora.org), baita horretarako preseski egokitu duten whatsapp kanal batean eta helbide elektroniko batean ere (ibaitikitsasora@yahoo.com). Huartek herritarrak animatu nahi izan ditu etaparen batean edo bertzean parte hartzera, baita arratsaldeetan herri desberdinetan eginen diren ekintzetara hurbiltzea ere. Elkartasuna adierazi eta genozidioa salatzeko aukera aprobetxatu nahi dute, herritarrak kontzientziatzen dituzten bitartean.