Eguzki talde ekologistak eta Mutriku Natur Taldeak pozik hartu dute Eusko Jaurlaritzak angularen (aingira gaztea) arrantza-kanpaina bertan behera uzteko erabakia. Ekologiston arabera, espeziearen egoera oso larria da eta urteak daramatzate zientzialariek arrantza gelditzeko eskatzen.
Jaurlaritzak adierazi du azken txosten zientifikoetan oinarritu dela, eta horiek baieztatzen dute aingira europarra “segurtasun-muga biologikoetatik kanpo” dagoela. Arartekoak ere ohartarazi zuen aurretik onartutako dekretuak angularen arrantza profesionalizatzea helburu zuenak ez zuela oinarri zientifikorik eta Europar Batasunaren araudiaren aurka zihoala.
Talde ekologistek gogorarazi dute urte luzez kritikatu dutela profesionalizazio-dekretua, eta uste dute Arartekoaren azken ebazpena funtsezkoa izan dela Jaurlaritzak jarrera aldatzeko. “Azkenik, zientziaren eta biodibertsitatearen aldeko urratsa egin da”, adierazi dute Eguzki eta Mutriku Natur Taldeko kideek.
Hala ere, ohartarazi dute erabaki hau berandu datorrela, eta aingira europarra dagoeneko egoera larrian dagoela. “Hurrengo urratsa espeziearen berreskurapena bermatzeko neurri eraginkorrak ezartzea izango da”, gaineratu dute.