«J’accuse» izendaturiko auzian, Baionako epaitegiak erabaki du akusatu guztien errugabetzea. Korrika garaian migratzaileekin muga pasatzeagatik epaituak izan ziren zazpi herritar joan den urrian. Akusatuak ziren egoera irregularrean ziren pertsonei Frantziako lurraldean sartzen laguntzeaz.
Epaiketan, prokuradoreak isunak eskatu zituen seirentzat, 1.500 euro fermu arte. Isun ttipiena 1.000 euro gibelapenarekin zen. Elementu eskasagatik ez zuen zigorrik eskatu zazpigarrenarendako.
Epaiarekin pozik agertu dira auzipetuak. Maritxu Paulus-Basurko epaituen abokatuak azpimarratu du hartu den erabakia juridikoa izan dela, ez eta politikoa.
Epaitua izan den Eñaut Aramendik lagundu dituztenak eskertu ditu, izan arlo juridikokoak, edota, militante eta mobilizatu diren guztiak. Dei egiten du aurrera segitzera lanean, borrokan, eta, ahal bada, kolektiboki, ohartaraziz: "Azpimarratu behar dugu Bidasoa honetan gutienez bederatzi pertsonak galdu dutela bizia eta guk honen artean borrokatu beharko dugula hori ez berriz gertatzeko". Gehitu du: "Segitu beharko dugula lanean denok eskubide berdinak izateko eta denok libre bizitzeko eta ibiltzeko Europa honetan".
Larunbat goizean Avenida zubian prentsaurrekoa eginen dute xehetasun gehiago emateko.