Udal igerileku berriaren proiektuaren eskutik doana da irailerako martxan emanen dutena: igerilekua, kiroldegia, Ikastola eta kolegioa modu berdean berotzeko azpiegitura eraikiko dute Engiek eta Herriko Etxeak. 2,18 milioi euroko kostua izanen du galdara kolektiboak eta haren beroa hedatzeko 667 metroko sareak.
Berotuko dituen lau eraikinen artean zalantzarik gabe igerileku berria da kontsumo handiena ekarriko duena, eta bien garapena aldi berean egin da. Piszina ireki baina hilabete batzuk lehenago prest izanen da bero sarea, irailean. 230 kWko bi galdara hartuko dituen eraikina Irandatz kiroldegiaren bazterrean eraikiko dute, belardi baten azpian erdi lurperatua, “eragin bisuala txikituz”, Herriko Etxeak azaldu duenez. 5inq Architecte kabinete paristarrak diseinatu du eraikina, igerilekua egin duten berdinek. Etchart enpresak eraikiko du, lurpeko bero sarea berriz Neo Réseaux enpresak hedatuko duelarik.
Eraikuntzaren koordinazioaz gain, sei urteko ustiapen baimena ere izanen du Engie Solutions enpresak. Enpresako ordezkariek azaldu dutenez, 248 tona karbono dioxido aireratzea saihestuko dute urtean. Ez da haatik erabat berriztagarria izanen sortuko den energia: %90 izanen da halakoa.
“Tokiko ekonomia sustatuko” duela ere azaldu dute; izan ere, galdarak elikatzeko egurra Hendaiatik 30 kilometroko perimetroko oihanetakoa izanen dela argitu dute. Urtean 280 tona egur erreko dutela aurreikusten dute.
Kotte Ezenarrok azaldu duenez, “egungo testuinguru ekonomiko hertsian” proiektu estrategikotzat du hau Herriko Etxeak, “azpiegitura publikoen karbono marka murriztea” ahalbidetzen baitu, baina baita “energiaren kostuak menperatzea” ere. Izan ere, egurraren prezioa finkoa ez bada ere, erregai fosilen gorabeheretatik urrun da; ingurumenarentzat ez ezik, Herriko Etxearen kutxarentzat errespetuzkoagoa izanen da beraz irailetik landa Irandatzeko eraikinen bero sarea. Pisuzko argudioa 20,9 milioi euroko zorra duen Herriko Etxearentzat.
