Trantsizio ekologikoaren estrategiaren baitan kokatzen dute agintariek proiektua. 12 hilabete emango ditu etxe hauek Promolotec elkartearen "Rénovation responsable" labela eskuratzeko eginbeharreko birgaitzeak.
Proiektua bertako bizilagunekin adostu dute erakunde publikoek. Kotte Ezenarro Hendaiako auzapezak aditzera eman du, zentzu honetan, energia efizientzia hobetzeko lanek helburu bikoitza dutela. Etxebizitza hauen kontsumo energetikoa apalduz gutxiago kutsatuko dutelako, baina alokairu sozialean bizi diren diru iturri apaleneko familientzat onuragarria izango delako ikuspegi ekonomikotik ere, fakturak ttipituz batetik, eta pobrezia energetikoa sahiestuz bestetik.
Etxeak zaharrak dira, 1966. urtean eraikitakoak, eta eraikinen kanpoko isolamendu termikoa hobetuko dute, baita bizitoki barrukoak ere. Helburu berarekin lehioak eta ateak ere berrituko dituzte. Era berean, lurrazpian kokatuak dauden trastelekuen hezetasun arazoak konponduko dituzte, eta eraikin osoarentzat aireztatze sistema moderno bat instalatuko dute.
Bestalde, berogailu partikularrak gas-kondentsaziozkoengatik ordezkatuko dituzte A eta C eraikinetan (B multzoak berritua baitu). Beste zenbait hobekuntza egingo dituztela argitu dute agintariek: interfonoak, suteen kontrako segurtasuna indartu edota zenbait balkoien estruktura sendotzea ere.
Claude Olive, l’OFFICE64eko presidentearen arabera, "erronka klimatikoari egokitzeko eta herritarren beharrei erantzuteko eboluzioaren" adibidea da proiektua. Kotte Ezenarrok ere, herritarrekin konpromisoa adierazi nahi izan du, "etxebizitza erosoak eta egungo beharrei egokituak eskaintzea lehentasunetan emanez".