Hendaian bizi da Imanol Espinazo, artista da eta euskaldun berria. Euskara ikasteko egiten ari den bidaiaz hausnartu eta gero, euskara erdipurdi jakin, egunero saiatu, baina euskaldun zahar askoren artean «euskaldun baino akatsdun» sentitzen bada, Euskal Herrian bere egoera berean aurkitzen diren milaka lagun horietariko bat delakoan dago. Hau oinarri hartuta Des Vents et Marées konpainiarekin, euskara ikasten ari diren guztiek ulertzeko moduko arnasgunea sortu zuen 2023an irrati-uhin edo podcast batean. Dortoka irratsaioa sortzea erabaki zuen orduan, eta Hendaiako tren geltokian dagoen Borderline Fabrikan egin zuen aurreneko saio esperimentala, proba pilotoa Hendaiako Euskararen Urtaroaren barruan.
Martxoaren 28an, aldiz, Odei Barroso gonbidatu du 21:00etan Hendaiako Borderline Fabrikara. Odei raplari urruñarrak zuzenean “Goizegi hiltzeko” diskoa aurkeztuko du bertan, eta euskara ikastearen prozesuari buruzko elkarrizketak eta gogoetak egingo ditu Espinazok. Zenbait sorpresa gorde dituela iragarri du ere. Orain artean grabatu dituen beste hiru saioak bezala, Antxeta Irratian aurki entzungai izango dugu irratsaioa.
Dortoka Komunitatea
Euskara hartu eta eman egiten denez, Imanol Espinazok aitortzen du gutxieneko maila eskuratuta, hizketaldien abiadura dela arazorik handiena ikasteko prozesuan ari denarentzat. Eta hortik sortu zuen Dortoka komunitatea edo podcasta. Hanka-sartzeen beldur, beste euskaldunen aurrean txikitu egiten dela aipatu digu, eta epaitua sentitzen da etengabe. «Nire burua epaitzen dut beti, baina gizarte osoak epaitzen dizu, euskara polita edo euskara ona ez dela, baina, azken batean, euskara da eta kitto!», aldarrikatzen du.
Alde horretatik, dortokaren abiadura motela eta babesten duen maskorra irudikatzen ditu podcastaren filosofiaren oinarrian. «Euskara ikasten ari garenok laguntza behar dugu, babestuak sentitu, eta maskor horren barruan sartu eta aurrera egiteko gonbidapena da», argitzen du. Izan ere, euskaltegiko irakasleei ulertzen diela aitortzen du, «zer dira martzianoak? Ba, ez, mantsoago hitz egiten dute besterik ez», dio. Hortik kanpora aldiz «zerbait interesgarria euskaraz entzun nahi dudanean, irratia piztu eta azkenean galduta sentitu eta itzali egiten dut». Gaur egungo gizartearen abiadura azkarra dela ulertzen du, baina horregatik guztiagatik, euskaldun guztiok elkar ulertzeko moduan hitz egiteko topagune bat sortu du Dortoka podcast honetan.
