Maiatzaren 21etik 24ra Antzerkiaren Maiatza festibalak 25 konpainia eta 40 ikusgarri baino gehiago proposatuko ditu Hendaiako kale eta plazetan urririk. Lau hamarkadako ibilbidea egin duen jaialdiak Euskal Herriko eta Frantziako goi mailako kale-antzerki, zirku, dantza eta musika performance ibiltariak jasotzen ditu urtero, «arte bizia eta herritarren parte-hartzea uztartuz».
Datorrena, asteburu luzea izango dute Hendaian. Baina apirilaren 30az geroztik jaialdiaren bueltan antolatutako hainbat ekimenekin asetu dute arte eszenikoen egarria. Haien artean, Mendizolan kulturgunean festibalaren 40 urteko bilakaera kontatzen digun "40 urteko historia" erakusketa, maiatzaren 30era arte bisita daiteke.
1985ean sortu zenetik, arte bizia eta herritarren parte-hartzea uztartu ditu festibalak, Hendaiako kale eta plazak arte eszenikoen agertoki bilakatuz. Hasiera batean behartuta, Hendaian ez zelako antzerkia, zirku eta dantza emanaldietarako areto egokirik. Gorabeherak izan dituen festibala bada ere, azken urteetan Hendaiako herriko etxeko Kultura Zerbitzuarentzat urteko hitzordurik garrantzitsuena bilakatu da. Eta aurtengoan ere, sorkuntza berriak ez ezik, sorkuntzarako espazioak eskaini ditu jaialdiak.
Lau egunez, 25 konpainia eta 40 ikusgarri baino gehiago proposatuko dituzte, bereziki Hendaiako erdigunean (Gaztelu Zaharreko herrixkan), baina auzoetan ondo errotutako hitzordua ere bada. Dena dela, sorkuntzarako espazioen artean, bi urtean behin, Chimeres antzerki konpainiak Itsas Ospitalearekin elkarlanean sortzen duen obra dugu. Bertako erabiltzaile, eri eta elbarriekin batera sortu, eta haiekin batera taularatzen dute jaialdirako espresuki sortutako ikusgarria. Aurten "Finalement on est devenus trés précis" antzezlana sortu dute, eta maiatzaren 15etik 17ra hiru emanaldi proposatu dituzte jendaurrean aurkezteko. Hiruetan bete egin dute.
Asteburuan zirkulazio aldaketak erdigunean
