Joan den maiatzean Kalez-Kale programaren bigarren fasea Pasaia kalearen inguruan ere egiteko proposamena egin zuen Hondarribiko EAJk. Eta 2024ko udal aurrekontuetan ere partida bat sartzeko eskatu zuten inguru hori berrurbanizatzeko, baina ez zen onartua izan. Akartegi auzoko eremu erresidentzial horretan eskuhartzea beharrezkoa da jeltzaleen arabera. Gonzalo 'Txalo' Carrion EAJko bozeramaleak argitu duenez, "60. hamarkadaz geroztik berritu gabe dago, eta espaloi estuak eta argiteria ez ezik, lurrazpiko ur-sanemandua berritu beharra dago". Inguruetan Donosti kalean hainbat hobekuntza egin direla oroitarazi du, Kalez Kale programari esker 14 kale edo eremu nagusi berritu baitira azken hilabeteotan. Baina beste kale batzuk ere beharrak dituztela nabarmendu du Carrionek.
Horretarako gainera, Txingudiko Zerbitzuak Mankomunitateak bere inbertsio planean onartua duela diote jeltzaleek. "Hala adostu genuen aurreko agintaldi bukaeran, urteotan lan horiek egiteko", argitu du. Baina Hondarribiko Udalak bere eskumeneko urratsak eman behar dituela diote azaleko obra aktibatuz. Udal Gobernua azken asteotan auzotan egindako bilera dinamika dela eta, Pasaia kaleko eta inguruetako bizilagunen eskaera gogoratu nahi izan du EAJ udal taldeak. Eta horregatik, udaberriko aurrekontuen kreditu aldaketan proiektua idazteko diru-partida bat eskatzen dute.