ADINBERRIk 2018tik 6.075.000 euroko aurrekontua bideratu du eta 92 proiektu finantzatu ditu guztira, bakardadea prebenitu eta adinekoen ongizatea bultzatzeko. Aurten 800.000 euroko aurrekontuarekin, 12 proiektu babestuko ditu, nahi ez dugun bakardadea prebenitzeko. ‘ADINBERRI-HARIAK’ laguntzen deialdiaren onuradunen artean, Hondarribiko Udaleko Gizarte Kohesiorako arloak abian jarritako Auzosare (AuzoEKIN gisa berrizendatua) proiektua dago. Abenduko udalbatzan onartu eta urtarrilan ekin zioten programari, eta diagnostikoa egin eta hainbat fase ondoren, udalaren helburua da zaintza komunitario sare bat osatzea herrian, Auzozain figura sortuz.
Gaur Donostian egindako aurkezpenean, Josu Peña zinegotzia bertaratu da, eta bertan argitu dutenez, proiektu onuradunak HARIAKen I. Jarduketa Planean (2022-2027) sartuko dira, eta “etorkizuneko tokiko ekosistemen enbrioi potentzialak” direlako. Hortaz, gero eta zabalduagoa dugun errealitate horri helduz politika publikoetan pertsonen zaintza erdigunean jartzeko helburua dute. Maite Peña Zainketetako eta Gizarte Politiketako diputatuak azpimarratu duenez, «politika publikoek beharrezkoak dituen lurralde-ekosistema osoari lagunduko diote». Gogorarazi duenez une honetan Gipuzkoan tokiko 18 ekosistemetatik 7 arlo horretan ari dira lanean dagoeneko (Elgoibar, Errenteria, Hernani, Lizartza, Pasaia, Oiartzun eta Zesto), eta deialdi honi esker, udalerri horietako batzuk ez ezik, beste herri batzuek ere aukera izango dute bakardadeei aurre egiteko lurralde osoan eragina izango duten ekimen berritzaileak abian jartzeko. Haien artean, Antzuola, Astigarraga, Beasain, Bergara, Elgeta, Eskoriatza, Leintz-Gatzaga, Oñati eta Hondarribia.
Auzozain Sarea Hondarribian
Azken honetan martxan jarri berri dute AuzoEKIN ekimena. Zabalduz Kooperatibarekin batera, isolamendua pairatu dezaketen 60 urtez gorako herritarrak lagundu eta haien beharrak erdigunean jarriko dituen Auzozain Sarea osatu nahi dute. Josu Peña hautetsiak argitu digunez, profesionalen akonpainamendua eta prebentzio lanaz gain, herritar bolonturioen zaintza komunitarioa funtsezkoa izango da, Oiartzunen edo Errenterian emaitza onak eman dituen egitasmo honetan.
Hala, gizarte eta hezkuntza esku-hartze baten bidez adinekoa erdigunean jarriko duen ongizatera bideratutako zaintza komunitarioen ‘AuzoEKIN’ proiektua gauzatuko dute. Udaletik jakinarazi dutenez, gizarte hezitzaileak lanean hasi dira dagoeneko, eta otsailaren 25ean, 18:30ean Udaletxeko Areto Nagusian, datozen hiru urteetan garatu nahi duten ekimena jendaurrean aurkeztuko dute.
