Hondarribiko Udalak 36.000€ko partida bat onartua dauka 2025eko udal aurrekontuetan, Pasaia kaleko eraberritze lanak hasteko. Akartegi auzoko Pasaia kalea 60. hamarkadatik berritu gabe dago, eta Txingudiko Zerbitzuak Mankomunitateak bere inbertsio planean onartua du joan den agintaldi bukaeratik. Izan ere, udalak bertan egingo dituen kalea birzolatu, argiteria berriztatu eta gaur egungo irisgarritasun irizpideetara egokitzeko lanez haratago, lurrazpiko ur-saneamendu sarea ere berritu beharra dago.
Hondarribiko EAJk 2023ko maiatzean Kalez Kale programaren bigarren fasearen barruan Pasaia kalea sartzeko proposamena egin zuen, eta ondoren, 2024ko udal aurrekontuetatik kanpo utzi izana leporatu zion udal gobernuari. Baita iazko udaberriko kreditu aldaketan inbertsio hau kontuan hartzeko eskatu ere. Akartegi auzoko eremu erresidentzial horretan esku hartzea beharrezkoa da jeltzaleen arabera. Gonzalo 'Txalo' Carrion EAJko bozeramaleak orduan Antxeta Irratian argitu zuenez, «60. hamarkadaz geroztik berritu gabe dago, eta espaloi estuak eta argiteria ez ezik, ur-sanemandua berritu beharra dago».
Udala orain hasi da proiektua mugitzen, eta bertan egin beharreko lanak auzokideekin adostu nahi ditu, haien iritziak jaso eta gabezi handienak zeintzuk diren identifikatzeko. Beraz, interesa duten bizilagun guztiei irekita, apirilaren 2an 18:00etan kontraste bilera proposatzen dute Talaia-Bordari ikastetxeko Ikaslab gelan.