Euskaraldia Hondarribian herriko euskararen erabilera hauspotzeko mugarri izan nahi badu, Euskaraldirako herrian antolatu dituzten 30etik gora ekimenen artean, amaiera ekitaldi handia prestatzen ari dira maiatzaren 24an. Dagoeneko, Gabi De La Mazaren "Txantxangorria euskarazko karaokea" datu basean saltzeatzen ibili dira. Eta 80 abesti hautatuko dituzte egun horretan herriak kantatu ditzan. Maiatzaren 24an Madalen plazan ospatuko den Euskaraoke Herrikoiak ahalegin handia eskatuko duela aitortu digu Igor Arrieta Euskaraldiaren herriko dinamizatzaileak, baina herrian"Euskarari ximiko!" egiteko helburuarekin, «ekimen guztiek herritarren aktibazioa eta parte hartzea bilatzen» dutela azpimarratu du, «jendea ez dadila albo batean geratu modu pasiboan».
Maiatzaren 24an ospatuko duten Euskaraoke Herrikoa 2024an eratutako Euskara Mahaian planteatu zuen Garoa Lekuona Euskara Saileko zinegotziak aurreneko aldiz. Berak azaldu digunez, «ausartu nintzen buruan nuen ideia ero hau ahoskatzen, eta pentsatu genuen, zergaitik ez? Gero Euskaraldiaren herri batzordea sortu zenean serioago hartu genuen, eta gogoa dago erronkari heltzeko eta arrotasun hori bilatzeko», dio Udal Euskara ordezkariak. Izan ere, maiatzaren 15etik 25era ospatuko den Euskaraldia herrian euskararen erabilera sustatzeko aitzakia bat gehiago besterik ez bada ere, «harrotasunez adierazteko aukera dugu, hondarribiar bezala horrelako zerbait egiteko gai garela», dio Garoa Lekuonak.
Egun horretan Madalena plaza euskararen arnasgune bilakatu nahi dute. 80 abestik osatuko dute ekimena, eta beraz abeslari edo pertsona talde beharko dituzte horretarako. Izena emateko epea zabaldu berri dute martxoaren 31n. Eta argitu dutenez, apirilaren 30a bitarte www.hondarribia.eus udalaren atarian izena eman daiteke. 16 urtetik gorako partaideek Euskaraldiko Ahobizi edo Belarriprest txapa jarria eraman beharko dute oholtza gainera abestera igotzeko, eta 16 urtetik beherakoek, aldiz, Xaxatzaile txapa. Eta denek ekimenerako egindako zapi berezia lepoan lotuta eramango dute. Hauek dira bete beharreko baldintzak, eta Lekuonak azpimarratu duenez, «nahi duguna da apuntatzen den horrek argi edukitzea euskararen aldeko konpromisoa hartzen ari dela».
Nolanahi ere, Euskaraokeak Euskaraldiak bezalaxe, «ilusio pizgarri eta herri mailako erronka» bilaka dadin nahi dute antolatzaileek. «Kantu eta dantza egiten duen herri bat ez da inoiz hilko, eta hori bilatu nahi dugu, herria kantu eta dantzan jarri, baina euskaraz», azpimarratu du Garoa Lekuonak.
