Hondarribiarrek bizi duten etxebizitza estutasunari aurre egiteko, aurreko udal gobernutik eratorritako etxegintzari lotutako proiektuak berriz negoziatu eta, herritarren beharrak asetzeko, ahal den guztia optimizatzeko konpromisoa adierazi du Abotsanitzek. Diotenez, irizpide hori jarraitu dute Mendienea (Montañenea) promozioan, eta berdin jokatu du udal gobernuak orain Madalena Kuboaren hitzarmena berriz negoziatzerakoan ere. «Zuten kutsu pribatiboari buelta eman diogu ahal izan dugun neurrian», dio Abotsanitzek, «etxebizitza publikorik ez zeuden tokian, orain 50etik gora eskuratuko ditugu Udalaren Etxebizitza sailarentzat».
30 bizitoki eta udal erabilerarako eraikin oso bat
Alde horretatik, Mendienea (Montañenea) promozioarekin egin zuten bezala, oraingoan udalak Madalena Kuboaren hitzarmenean herriarentzat aurreikusia zegoena baino akordio onuragarriagoa lortu dutela jakinarazi du Abotsanitzek. Bertan 34 etxebizitza pribatu eraiki behar zituen Construcciones SUKIA S.A. promotorak. HAPOaren arabera 13 publiko eraiki behar ziren, baina udalak 1.556.520 euroko konpentsazioa jasotzea erabaki zuen 2017an. Eta HAPOak zehazten zuen eraikigarritasun mailara egokitzeko eraikinaren fatxadaren altuera handitzeko Rehabite enpresak aparteko estudio tekniko bat ere egin behar izan zuen 2019an, 3.545 metro eraikigarrietatik 3.793 metro koadrora handitzeko. Gerora, proiektuaren hasierako onespena 2020ko ekainaren 12an eman zen alkate dekretu bidez. Aldiz, aipatutako hitzarmena berriz negoziatu egin du Hondarribiko Udalak orain, eta aurreko akordioaren ordez, 36 pribatu baimenduko ditu, baina dagoeneko eraikiak dauden 30 publiko jasoko ditu Labrederren (Atseden Kalean) konpentsazio gisa. Hauek alokairu sozialera bideratuko dituzte, eta 3,5 milioi euro balio dituen eraikin blokea musu-truk eskuratuko du.
Hortaz gain, Jabier Ugarte kalean “Euskaraz Kapen” murala dagoen orubean, BAZ aurrean, erdi-soto, behe solairu, gehi hiru solairu izango dituen eraikin bat lortuko du udalak, azpiegitura dotazionaletara bideratuta. Bertan, adibidez, udalak Herritarren Arreta Zerbitzua kokatu dezakeela dio Abotsanitzek. Argitu dutenez, ekipamendu eta udal erabileratara bideratuko den espazio horrek milioi eurotik gorako kostea du, eta udalak 312.000€an eskuratuko du eraikin osoa.
Madalena Kuboaren hitzarmena 2017an hitzartu zuen udalak Txomin Sagarzazu alkate zenean. Orduan 31 etxebizitza pribatu zihoazen Madalenako kuboan, eta beste 3 Jabier Ugarteko 9. zenbakian, etxeen artean hutsik dagoen orubean.
Abotsanitzek oroitarazi duenez, eraikuntza berrien %40 etxebizitza publikoa behar duela agintzen duen Etxebizitza Legea aplikatuz gero, 34 etxebizitza pribatu beharrean, 12 publiko eta 22 libre eraiki beharko lirateke. Baina udal gobernuak dio, orain «alokairura bideratutako etxebizitza publikoa maximizatzeko formula bat» bilatu duela, eta berriz negoziatu egin duen honetan, «ahalik eta gehien egitea, ahalik eta azkarren, Hondarribian bizitzea eskubidea izateko eta ez luxu» izan da jarraitu duten irizpidea.
Izan ere, gaineratu dutenez, 12 etxebizitza publiko jasotzeko aukera zegoen Madalenako Kuboan, edo 1,48 milioi euroko konpentsazioa jaso eta etorkizunean diru hori erabiltzeko beste nonbait etxebizitzak eraikitzeko. «Baina iraganean ikusi izan dugu, horrela, etxebizitza pribatuak berehala eraiki eta etxebizitza publikoak bigarren maila batean geratu eta eraikitzeko prozesua asko luzatzen zela», diote. Aldiz, erabaki eta adostu dena da jarduketa berezi bat burutzea. Madalenako Kuboko lursailean, orain, 36 etxebizitza pribatu egingo dira, eta hauen eraikuntza amaitu baino lehen entregatu beharko dituzten 30 publikoak jasoko dituzte Labrederren.
Horrenbestez, azken hilabeteetan eramandako negoziazioei esker, Hondarribiko Udalak eskuratuko dituen 50etik gorako etxebizitza publikoak dohainik eta eraikiak jasoko dituela azpimarratu du Abotsanitzek. «Kudeaketa eta negoziaziorako gaitasuna eta herriaren alde onena bilatzea behintzat, ezin zaio ukatu udal gobernuari», goraipatzen du gobernuan den alderdiak.
Egiteko molde berriak
Momentuz, aurreikusiak ez zeuden 50 etxebizitza publiko berri eskuratu ditu udalak Mendienea (Montañenea) eta Labrederren artean (hauek Madalena Kuboaren hitzarmenari esker). Hala ere, Abotsanitzek iragarri du hemendik aurrera emango diren hitzarmenetan, Abotsanitz parte den udal gobernuak «zerotik negoziatuta, etxebizitza publikoen handitze nabarmen bat espero» duela. Montañenea eta Madalenako Kuboaren hitzarmena «ez dira azkenak izango» iragarri dute.
Era berean, Montañeneako akordio berriak udalgintzan sorrarazi zuen eztabaida politiko eta oposizioko taldeen ñabardurak errepika ez daitezen, gobernuan den Abotsanitzek ohar baten bidez azpimarratu du, atzoko Hirigintza batzordean, alderdi guztietako zinegotziek aukera izan zutela nahi bezain beste galdera eta kezka argitzeko Madalenako Kuboaren hitzarmenaren inguruan.