EAJ udal taldeak aditzera eman duenez, «udal gobernuak behin-behinean onartu duen HAPOak segurtasun juridiko falta handiak dituenez», funtsezkoa ikusten dute «benetako errealitateari egokitutako etxebizitza irtenbideak planteatzea». Honi lotuta, gazteei alokairurako laguntzak (100.000€), etxebizitza publikoko sustapenak kudeatuko dituen Udal Etxebizitza Saila sortzeko beste 100.000€ko partida proposatzen dute. Bestalde, Biteri kaleko (Jostaldi eta Muliate artean) etxebizitza publikoen proiektua egiteko beste 150.000€ kalkulatzen dute.
Bestalde mugikortasunaren arloan, udal gobernuak abenduan martxan jartzeko prest egongo den hiri-autobusaren geltokien egokitzapenerako 200.000€ko partida eskatzen du EAJk. Eta hirian dauden bidegorrien sarea osatzeko beste 200.000€. Era berean, herrian lurrazpiko aparkalekuaren proiektua Jabier Ugarten bultzatu nahi dute jeltzaleek, eta proiektua bultzatzeko 150.000€ proposatzen dituzten bitartean, oinezkoen mugikortasunari begira, beste 100.000€ko diru partida eskatzen dute Santiago eta Harresilanda kaleetako igogailuen proiektuak sustatzeko.
Proposatutako diru kopuru handienak, aldiz, aisialdirako eta kirolerako inbertsioetara bideratu nahi du EAJk, orotara 1.220.000€. «Kulturak eta kirolak bizitza-kalitatean duten garrantzia» azpimarratzen dute jeltzaleek. Alde horretatik, Skate Park eta Pump Track bat egiteko 430.000€ proposatzen dituzte, eta kirol instalazioen hobekuntza beharrezkoa ikusten dutenez, 200.000€ko partida aurkezten dute horretarako. Era berean, kalistenia gune bat egokitzeko 100.000€ gehiago.
Kultur arloan, udako musika jaialdi batentzako 200.000€ proposatu dituzte. Eta beste zenbait inbertsio txiki ere, hondartzako gabarroia berreskuratzeko (100.000€), Guadalupeko tabernaren proiektua (60.000 €) edota herrian ludoteka edo haurreskola berri baten bideragarritasun-azterketa egiteko (30.000€).
Gainerako diru partida proposamenen artean, nekazal-bideak konpontzeko (300.000€), Mendelu eta Arkolla auzoetako espaloien hobekuntzarako (250.000€), marea-biziak saihesteko babes-lanetarako (150.000€), suteen prebentziorako mendiak garbitzeko (100.000€) edota Goiko-Errota berriz martxan jartzeko proiektua (75.000€) nabarmendu daitezke. Ondare historikoaren zaintza eta berreskuratze lanei lotuta ere, San Telmo gazteluko ikerketa eta lan arkeologikoak diruztatzeko 30.000€ eta Alde Zaharreko parrokiako kanpai eta kanpandorrearen konponketarako 9.000€ eskatzen ditu EAJk.
Azkenik, Hondarribiko ekonomiaren garapenerako merkataritza establezimendu berrientzat "Kale Biziak" alokairu-laguntza (75.000€) edota herriko elkarte eta gobernuz kanpoko erakundeak laguntzeko partidak ere negoziatu nahi dituzte jeltzaleek 2026ko udal aurrekontuei begira. Elkarte kultural, kirol eta bestelakoentzako dirulaguntzen %10eko igoera (60.000€), eta eragile hauen izapidetzeak errazteko aholkularitza zerbitzua (18.000€) besteren artean.