San Pedro eta San Martzial jaietarako prestakuntza lanekin hasia da Irungo Udala, eta jakinarazi dutenez martxoaren 31n itxiko dute jaietan txosna jartzeko eskaerak egiteko, baita jaietako kontzertuetan talde nagusien aurretik telonero gisa Irungo taldeek jotzeko eskaerak egiteko ere.
Urdanibia plazan ekainaren 14tik uztailaren 1era jarriko dituzten sei txosnak zozketa bidez banatuko ditu udalak. Eta behin-behineko zerrenda apirilaren 2an egingo dute publiko. Zozketa, berriz, apirilaren 8an egingo dute Amaia KZko hitzaldi aretoan.
Kontzertuei dagokienez, ekainaren 21ean eta ekainaren 23an, Sune eta Gatibu taldeen telonero izateko aukera dute Irungo taldeek Urdanibia plazan. Zenbait baldintza bete behar dituzte taldeek. Ekainaren 21ean, Suneren aurretik aritzeko, Gazte Eguna izango denez taldekideen %70ek 18-25 urte artekoak beharko dute izan. Eta bi kontzertuetan, taldekideen %50k Irunen erroldatuta egon behar dute.
