Deialdian parte hartu ahal izango dute kultur edo kirol arloko irabazi asmorik gabeko entitate eta elkarteek, aisialdikoek eta entitate sozialek, baldin eta indarreko legediaren arabera eratuak badaude eta Eusko Jaurlaritzako Kirol Erakundeen Erregistroan edo Euskal Autonomia Erkidegoko Elkarteen Erregistro Orokorrean inskribatuta badaude. Halaber, ezinbestekoa izango da egoitza soziala Irunen izatea eta eskaera aurkeztu aurreko bi urteetan gutxienez Irunen jardun izana. Bi erakundek edo gehiagok eskaera bakarra aurkeztu ahal izango dute, betiere aipatutako baldintzak guztiek betetzen badituzte.
Irungo ikastetxeetako, Lanbide Heziketako eta Batxilergoko institutuetako eta Helduen Hezkuntza Ikastetxeko ikasleek ere parte hartu ahal izango dute, nahiz eta ikastetxe bakoitzak eskaera bakarra aurkeztu behar duen. Bestalde, beste edozein pertsona fisiko edo juridikok ere txosnak jartzeko aukera izango du, baina kasu horretan, postuetan edariak eta ogitartekoak bakarrik saldu ahal izango dira. Ekainaren 14tik uztailaren 1era egongo dira martxan, bi egun horiek barne, eta gehienez ere sei baimen emango dira, zozketa bidez esleituta.
Eskaerak aurkezteko epea amaitu ondoren, onartutako eskaeren behin-behineko zerrenda eta baztertutakoen zerrenda apirilaren 2an argitaratuko dira. Zozketa apirilaren 8an egingo da, Amaia KZko hitzaldi aretoan, eta eskatzaile bakoitzak ordezkari bat izan beharko du bertan. Interesdunek Irungo Udalaren egoitza elektronikoan aurkeztu beharko dituzte eskaerak, eta informazio gehiago nahi izanez gero, Irungo Udaleko Kultura Arlora jo dezakete edo udalaren webgunea kontsultatu.