Gaur hirugarren greba eguna dute Hezkuntza Publikoko irakasleek. Donostian manifestazio orokorra egingo dute gaur, eta apirilaren 1 eta 2ko greba egunak bere horretan mantentzen dituzte, Steilas, LAB, ELA eta CCOO sindikatuek Eusko Jaurlaritzarekin negoziaketak aurreratzen ahalegintzen ari diren bitartean. Irakasleen greba mugimendua bada ere, Txingudi Ikastolako Guraso Elkartetik greba mugimendu honen balorazioa egiteko oharra plazaratu berri du sare sozialetan. Irungo hezkuntza zentro honetan grebaren jarraipena nabarmena izan da, %63koa Txingudi HH-LHn eta %72koa Txingudi BHI ikastetxean.
Txingudiko gurasoek haien babes osoa adierazi diete «egunotan hezkuntza publiko duin baten alde borrokan ari diren irakasle guztiei». Eta gogoratu dute, irakasleen lan baldintzak ez ezik, euren seme-alabek merezi duten arreta eta kalitatezko denbora bermatzeko baliabideak ere daudela jokoan. Hortaz, greba ziklo berri honekin bat egiteaz gain, beraienak ere egiten dituzte grebaren helburuak.
Ohar honetan salatu dutenez, «Eusko Jaurlaritzak Irungo benetako errealitate soziala irudikatzen ez duten ikastetxe itunduetan bunkerizatuta dauden irundarren hezkuntza pribatua diru publikoarekin laguntzen duen bitartean, eskola publikoa babesteko borondate eza erakusten du, urtetik urtera, gure eskolak eta irakasleen baldintzak prekarizatuz».
Gurasoek kezka agertu dute, honek seme-alaben etorkizun akademikoa eta laboralaz gain, eskolan egunerokoan haien ongizatea eta eskubideak kolokan jartzen dituelako, baita «demokraziaren eta eskola publikoaren ekidade eta berdintasun aukera printzipioak apurtu ere».
Bide batez, erakunde publiko bakoitzari dagokion ardura exijitu diote. Eusko Jaurlaritzari «irakasleen, haien ordezkoen, eta ikasle eta familia zaurgarrienak laguntzeko errefortzuen lan baldintzak edota eskolatze baliabide materialak bermatu behar dituelako». Baina baita Irungo Udalari ere, Txingudi Ikastolako instalazioen mantenuaz arduratzeko eskumena duelako Lehen Hezkuntzan, baina diotenez «gutxieneko hau ere ez da gaur egun bermatzen».
