Alejandro Mencías ekonomialariak Polo Kooperatiboen inpaktuaz eta, zehazki, BDS Koop Eraldaketa Fabrika sortu zenetik bost urte hauetan eskualdean izan duen eraginaren berri emango du martxoaren 28an (11:00etatik 13:00era) Palmera Montero gunean antolatutako Bidasoaldeko Ekonomia Sozialeko Foroetan. Dornaku Lantz, BDS Koopeko kideak aipatu digunez, orain artean 49 proiektu ezberdin garatu ahal izan dira BDS Koopetik eta arlo ugaritakoak. Izan ere, bazkide bakoitza bere alorrean lan egiten badu ere, lan egiteko modua eta antolatzeko eredua amankomunean dute. «Ekonomia egiteko modu demokratiko batean antolatuta gaude, sinergiak bilatuz, eta gizartearen onura bilatzen dugu gure jardueraren bidez, helburua ez delako etekin ekonomikoa edo kapitalista».
Alde horretatik, abstraktua irudi dezakeen arren, BDS Koopetik garatutako proiektuak ukigarriak dira, eta bidasotar askok hurbilekoak dituztenak. Antxeta Irratia da bazkideetako bat, Parean elkarte feminista, Labore Txingudi kontsumo arduratsua sustatzen duen Uranzu kaleko denda, elikadura burujabetzan oinarritzen den Hondarribiko Sorburu baratze elkartea, Aragorputz lehen hilerokoaren inguruko heziketa eta ikastaroak eskaintzen dituen eragilea, edota banaketa zerbitzua bizikletaz egiten duen Badoa kooperatiba, gaur egun IrunMarket plataformaren salmentak etxeetara eta Irungo Udalak instalatu dituen 24/7 zerbitzu ematen duten hiru kontsignetara banaketa segurtatzen duenak. Hauek adibide batzuk besterik ez dira. Baina Menciasek polo kooperatibo honek eskualdean izan duen eragina neurtu eta aztertu du, eta martxoaren 28an aurkeztuko ditu bere ondorioak, Palmera Monteron 11:00etatik aurrera.
Beste ikerlan batzuk
2024ko martxoan BDS Koop elkartetik eratutako trantsizio ekosozialerako Behatokiak egindako azterlanak dira otsailaz geroztik aurkezten ari direnak. Otsailaren 21ean “Zaintza kooperatibak. Irungo udalerrirako bideragarritasun plana” aurkeztu zuten, eta Behatokiak egindako azterlanak banan-banan aurkeztuko ditu apirilean eta maiatzean ere. Batetik, ekonomia zirkularrari buruz «agroelikadurak eduki ditzakeen aukerak» aztertu nahi dituzte, Zero Zabor eta KM0 irizpideetan oinarrituz. Honakoa Amanda Santosek Ekonomia Zirkularrak elikadura alorrean adituak emango du. Eta azken saioan, maiatzean, Iker Eizaguirrek Ekosistema Burujabeez hitz egingo du ere.
Dornaku Lantzek argitu duenez, gure lurraldean dauzkagun aukerak sakonean aztertzen dituen tresna da Behatokia, GEZKI ikerketa institutuaren laguntzarekin, eta zaintza kooperatiboa, ekonomia zirkularra eta polo kooperatiboen egiturak aztertu ditu azken urtebete honetan. EHUko 30 bat ikerlarik osatzen duten GEZKI institutoak egindako ikerlan guztiak interneten jarri dituzte eskura.
