Podemos Irun alderdiaren arabera, Irungo udal gobernuak hiriko proiektu estrategikoak garatzeko lidergo eta gaitasun falta erakutsi du azken hilabeteetan. PSEren eta EAJren arteko gobernu koalizio akordioak, hiriaren garapenerako proiektuak desblokeatzeko adostu zutela aditzera eman zuten Cristina Laborda eta Gorka Alvarezek joan den urtarrilean. Baina hilabeteak pasa ahala, Miren Etxebeste, Podemos Irungo koordinatzaileak uste du ez dutela urratsik egin.
Podemos Irungo bozeramaile eta zinegotzi Thania Pazosekin batera egindako agerraldian, «udal gobernuaren paralisia» salatu du Etxebestek. «Azken aldian aurreko agintaldian Podemosek gobernu taldean emandako bultzadari esker onartutako proiektuen inaugurazioak besterik ez dituzte egiten, baina proiektu berririk ez daude aurrera eramaten ari», argitu du alderdiko koordinatzaileak. Alde horretatik, joan den astean arrandiaz aurkeztu zuten CBA Kultura eta Sorkuntza Zentro berriaren proiektua diruztatzea haiekin batera bultzatutakoa izan zen, adibidez. Baina «Podemosen zigilua duten proiektuen zerrenda luzea» dela nabarmendu du: Emakumeen Etxea, Terma Erromatarrak eta Irungo Erromatar Museoan integratzea, Txenperenea eta San Miguel Anaka hiri-planeamenduaren gailurra edota Irun Zuzenean jaialdia besteak beste.
Proiektu estrategikoak geldirik
Haatik, legealdiaren erdialdea igaro da eta, hala ere, aurreko legealdian hasitako proiektu asko trabatuta geratu direla oroitarazi du Etxebestek. Bereziki PSEk eta EAJk urtarrilean sinatutako gobernu akordioaren ondoren. Eta adibideak jarri ditu. Emigrazio eraikinaren kasuan, atzerapenak eta arazoak etengabe kateatu dituen proiektua dela dio, eta 2022an Eusko Jaurlaritzarekin Lanbide bertatik ateratzeko akordioa lortu bazen ere, «gobernu taldearen lidergo faltagatik» gelditua dela salatzen du, «lehen fasea duela urtebete amaitu behar zen». Podemos Irun taldetik gogorarazi dute iaz obrak azarora atzeratu behar izan zirela, LANBIDEren eta SEPEren bulegoak beste leku batera eramateko denbora izan zezaten.
Hala ere, 2024ko abenduan, Lanbidek leku berean jarraitzen zuen, eta obrak hasi gabe jarraitzen zuten. «Irailean gaude jada, obrak ez dira amaitu, auzoa zain dago oraindik, eta Lanbideren bulegoek ezin dute beren zerbitzua ondo eman obren erdian. Ulertezina da, Eusko Jaurlaritzan eta Udalean alderdi berdinek gobernatuta, akordio hori betetzea ezinezkoa izatea», kritikatu dute.
Ildo horretatik, Irungo udal gobernu koalizioak beste erakundeen lankidetza behar duten proiektuak aurrera eramateko gaitasun falta agerikoa dela uste du Etxebestek. «Zer gertatuko da Txenperenearekin, IAM erabilera anitzeko pabiloiarekin, San Miguel-Anakako etxebizitza-sustapenekin, Korrokoitzeko eremuarekin, bizikidetza-planarekin, Txingudiko Plan Zuzentzailearekin?», galdetzen du. Hauetan guztietan, EAJk eta PSEk duela zortzi hilabete herritarrei aurkeztu zieten gobernu programaren kronograma eta betetze maila argi azaltzeko eskatu dio Podemos Irunek gobernuari.
