Irungo Udalak HAZ-SAC bulegoari buruz herritarrek egiten duten balorazioa neurtzeko 450 erabiltzaileri egindako inkestak ondorioztatu duenez, irundarren beharrak asebetetzen duen zerbitzua da. Erabiltzaileek 4,6 puntuko nota ematen diote 5etik, eta herritarrek eskura dituzten kanal guztietan balorazioa baikorra da, izan aurrez aurreko arreta, 010 telefonoa, webgunea eta autozerbitzuko terminaletan ere.
1997an HAZ zerbitzua Juan de la Cruz kalean sortu zenetik egungo San Martzial kaleko egoitzara lekuz aldatzeaz gain, zerbitzuak garapen bizia izan du, administrazio elektronikoari eta teknologia berriei lotuta. Bere lehen urtean 49.243 kontsulta eta arreta egin zituzten bitartean, mende laurden geroago lau milioi arreta baino gehiago eskaintzen ditu urtero kanal ugarietatik. Jon Ugarte, Gobernu Irekiko eta Herritarren Arretako ordezkaria pozik azaldu da erabiltzaileen gogobetetze mailarekin, eta «zerbitzua etengabe hobetzeko inkestaren datuak arretaz aztertuko» dituztela aditzera eman du.
Izaskun Larrarte HAZeko arduraduna eta Unai Goyoganak arloko zuzendariarekin batera aurkeztu ditu zinegotziak inkestaren datuak. Eta HAZ-SAC bulegoaren funtzionamenduaren balorazio orokorra ona bada ere, telefono bidezko kanalari dagokiona (010 edo 943 50 51 52) da batez besteko notarik apalena jaso duena, 4,6 puntu eman diote 5etik. Era berean, 5etik 4,76 puntu lortu dituzte arreta-denborak eta ordutegiak, langileen ezagutza mailak, eskaera telefonoz ebazteak eta erantzunaren zehaztasunak. Udalak argitu duenez, hilero ia 7.000 dei jasotzen ditu zerbitzu honek, egunean 333 batez bestean.
Bestalde, telefonoz emandako zerbitzuen artean, galdutako objektuena da baloraziorik onena jaso duena, 4,90 puntu 5etik. Hain justu, udalak Internet atariaren bitartez hobetu nahi duen zerbitzua.
Haatik, irundarrek ondoen baloratzen dituzten zerbitzuak, autozerbitzuko terminalen sarea (4,88) eta aurrez aurreko arretarena (4,83) dira. San Martzial kaleko bulegoan hilero 5.000 pertsonari arreta ematen diete, eta 8.000 izapide egiten dituzte, 380 egunean, batez bestean. Jon Ugartek azpimarratu du, aurrez aurreko zerbitzu honen alderdi positiboak identifikatzerakoan, inkestatuek «jasotako arreta eta adeitasuna, arretaren azkartasuna eta eraginkortasuna eta emandako laguntza» nabarmendu dituztela. «Hobetzeko alderdiak daude, hala ere, baina inkestatuen erdiek baino gehiagok diote zerbitzuarekin oso pozik daudela eta ez duela inolako hobekuntzarik behar», argitu du Ugartek.
Bestalde, autozerbitzuko terminalen sareari dagokionez, hilero 5.000 izapide kudeatzen dira kanal honen bidez. Eta erabiltzaileek arreta-ordutegi zabala eskertzen dute. Astelehenetik igandera 8:00etatik 22:00etara bitartean erabilgarri baitaude. Herritarrek erabilerraztasuna (4,92 puntu 5etik), zerbitzu eta izapideen eskaintza (4,92 puntu 5etik) eta autozerbitzu makinen kokalekua (4,86 puntu 5etik) baloratzen dute. «Herritarrentzako zerbitzu erabilgarria dela agerian geratu da», adierazi du Jon Ugartek, izan ere, inkestatuen %70ek esan du inprimagailurik ez daukalako jotzen duela autozerbitzuko terminaletara, eta %1 ordenagailurik ez daukalako. Izapiderik ohikoena, alde handiz gainera, erroldako ziurtagiriak eskatzea da, eta, atzetik, ordainagiriak eskatzea eta ordainketak egitea.
