Lakaxita gaztetxeko hormak eskuin muturraren gorroto eta mehatxuen mihisea bilakatu da azken urteetan. Irungo Udalak, mezu politikoen aurrean udal ordenantza aplikatuta, espazio publikoetan Palestinaren aldeko sinboloak ezabatzeko agindua sistematikoki ematen duen bitartean, ez dirudi azken urteetan hirian ohikoak diren pintaketa faxistak agintari politikoak eta polizialak kezkatzen dituenik. Palmera Montero gunean iaz agertu ziren mezu arrazistak gaitzesteaz harago, Irungo zenbait kolektibok etengabe jasaten ari diren erasoak ez baititu inork salatzen eta ikertzen.
Gaur gaztetxeko kideek enegarren aldiz garbitu beharko dituzte Lakaxitako hormak. Adolf Hitlerri gorazarre egiten duten mezuak, esbastikak, mugimendu antifaxisten kontrako mehatxuak, eta "Fuera sidosos", "Putos negros" edota "Putos rojos" bezalako mezuez josita topatu dituzte gaztetxearen kanpo hormak. Tamalez, normalizatu egin da.
Izan ere, 2024ko abenduaren 21ean, Santomas eguna zela probestuta, "Faxismoaren aurrean LAKAXITA tinko!" lelopean elkarretaratzea egin zuten Irunen, Lakaxita gaztetxeak hilabete hartan jasandako erasoak salatzeko. Aurreneko erasoa izan zen hura. Baina ez azkena. Lakaxita gaztetxeak ere, 2025eko maiatzean pintaketa nazi-faxistak salatu zituen berriz. “Stop LGTBI”, “Fuera degenerados” edota “No os dejaremos dormir” bezalako mehatxuak agertu ziren orduan Lakaxitako hormetan, diana baten marrazkiekin batera. Eta joan den martxoan bertan errepikatu zen episodio bertsua.
Martxoaren 19an Lakaxita gaztetxeko kideek salatu zuten «enegarrenez» eraso egin zutela gaztetxea faxistek, eta ekintza hauek salatzeko erabakia hartu zutela. Hartara, martxoaren 21ean (12:00etan) Sargia parkearen sarreran elkarretaratzera deitu zuten.
Irungo Lakaxita gaztetxea, espazio okupatu eta autogestionatu bakarra dela oroitarazi zuten. Eta une honetan San Migel-Anaka hirigintza garapenaren ondorioz, udalaren ardurapeko obraz inguratuta badago ere, erasotzaileek ez dute atzera egin. Baina faxisten etengabeko erasoak ez dira kasualitatea haien ustez. «Faxistek sistemaren edozein alternatiba suntsitzea dute helburu, zapaltzea eta isilaraztea eta gaztetxeak dituzte jo mugan, besteak beste».