Irungo Udaleko Euskara Zerbitzuak hiriko elkarte eta eragile andana batekin programa oparoa osatu dute aurten abenduaren ·ko Euskararen Egunaren bueltan. Bost asteko egitaraua ondu dute, Josu Iguiñiz Euskara ordezkariaren arabera, Euskararen Nazioarteko Eguna «egun bakarreko txinparta izan ez dadin». Hartara, urriaren 30etik abenduaren 9ra bitartean adin guzietarako aproposak diren hamaika hitzordu prestatu dituzte, abenduaren 3tik harago.
Joan den urria bukaeran Amaia Kultur Zentroan PausoK dantza eskolak Euskal Herriko zazpi lurraldeetako artistekin, kantu zaharrekin eta abesti berriekin, dantzarekin eta zuzeneko musikarekin, euskalkiei garrantzi berezia emanez antolatutako ikusgarriarekin ekin zioten programari.
Eta asteburu honetan bi hitzordu gozatu ahal izango dira. Batetik, azaroaren 13an, ostiralean, 17:30ean, Ene Kantak taldeak 'Amagoia Dragoia' ikuskizun berria eskainiko du Amaia Kultur Zentroan. Istorio berri honetan, Ene Kantak taldeak Amaiurreraino bidaiatuko du ustekabean, eta protagonistek injustiziek eta desberdintasunek markatutako komunitate batekin egingo dute topo Erdi Aroan girotutako kontakizun batekin. Abentura zaildu egingo da Amagoia Dragoia agertzean, herritarren artean zalantzak eta mesfidantza sortuko dituen herensuge misteriotsua. Amagoia Dragoia Nerea Urbizuk idatzitako eta Mikel Santos 'Belatz'-ek ilustratutako Amagoia Dragoiaren ezkatak liburuan oinarrituta dago. Gonbidapenak hemen eskuratu daitezke.
Bestalde, azaroaren 15ean, igandean, 12:00etan, 'Irunen Kantuz II' kale kantu-jira egingo da hiriko kaleetan zehar, Irungo abesbatzekin eta Benta Zaharreko Mutiko Alaiak taldeak girotuta. Ekimena ekainean abiatu zen, hiriko eragileek eskatuta, kalean kantatzeko ohitura berreskuratzeko eta euskarazko kantutegia zabaltzeko. Eta sanmartzialetan antolatutako saioak arrakasta izan zuenez, Euskararen Egunaren atarian errepikatzea erabaki dute.
Hurrengo hitzorduak
Asteburu honetarako prestatutako hitzorduen ondoren, azaroaren 21ean, larunbatean, Palmera Montero Guneak Euskal Herriko Hitz Gurutzatuen XI. Txapelketa hartuko du, goizez eta arratsaldez, Euskal Herri osoko parte-hartzaileekin. Eta azaroaren 28an, larunbatean, 19:00etan, Oiasso Museoan, Imanol Epeldek 'Zerbait sartu zait begian' bakarrizketa eskainiko du, musika, irudia, argia eta hitza uztartzen dituen pieza.
