Lesaka bertsogintzaren kabi dela eta bertsolari ugarik bertan kabida zutela azalduz ekin zioten pasa den asteburuko bertso eguneko afalosteko emanaldiari, eta arratsaldeko jaialdian ere izan zen agurretan Lesakak bertsolaritzaren bueltan eskaini duen guztia azpimarratu zuenik. Izan ere, bertsoak lekua izan duen herria da Lesaka, eta berezia izan zen bertso eguna bertan ospatzea, inondik ere.
Oinak bidean mendi ibilaldia izan zen eguneko lehendabiziko egitekoa. Lesakako bertsolaritzaren historiaren inguruko ibilbidea gidatu zuen Eneko Fernandezek, herriko bertsogintzan garrantzitsuak izan diren guneetan pausatuta. Manolo Arozena eta Jon Abril izan ziren azalpenak ematen, gainera. Gurean ere landu izan dugu gaia lehendik, eta gogoratu behar dugu aurkeztu zutenean bertan helburua hori zela nabarmendu zutela: «Herriko bertsolarien inguruko informazioa biltzen duen mendi ibilbidea egitea».
Hanketako oinak berotu ostean, mingaineko oinak berotzeari ekin zieten. Bertso poteoa izan zen herriko ostatuetan barrena, eta bertzeak bertze Epifora, Lili bertso eta Aramaioko bertso-eskoletako kideak aritu ziren kantuan. Tabernetako saioen ostean, jan edana izan zen Arrano elkartean.
Arratsaldean, Harriondoa kultur etxea jendez lepo bete zen XXI mende, 25 (H)ilbeltz bertso jaialdian. Alaia Martin, Maialen Lujanbio, Julio Soto, Amets Arzallus, Peru Abarrategi eta Maddi Ane Txoperena aritu ziren kantuan Alaitz Rekondoren gidaritzapean. Herri txikien problematikak eta mendearen erdia pasatu izana izan ziren bertzeak bertze saioren oinarriak. Jendeak txalo beroz erantzun zituen bertsolarien bertsoaldi ederrak. Linddurrenborda sagardotegian zuten afaria, eta afalostea Bortzirietako bertso-eskolako Hor Gu taldeko kideek eta Manex Pagola musikariak girotu zuten.
Josu Txoperena antolatzaileak azaldu digu «egunaren balorazio positiboa» egiten dutela eta «jendea konten» ikusi zutela. Bertsozale Elkartetik jaso zuten Lesakan bertso eguna egiteko proposamena eta Bortzirietako bertso-eskolako zenbait kidek «antolatzeko taldetxoa» osatu zutela aitortu digu, «lanak banatzeko». Bera afalosteko saioaz arduratu zen, eta aitortu digu urduritasun puntu batekin itxaron behar izan zuela emanaldia: «Presioa genuen eguna oni bukatzeko. Afaria ongi pasa zen Linddurrenbordan, eta beldur ginen ez ote zen luzeegia izanen gure emanaldia. Azkenean ongi joan zen eta jendeak harrera ona egin zion».
Kupela bat «historiako bertsolari onenari»
Afaldu aitzinetik, sorpresarik ere izan zen Linddurrenbordan. Izan ere, Juan Mari Lopez bertsolaria da Linddurrenborda sagardotegia daramana, eta hala, bertako kupel bakoitza bertsolari baten izenez dago izendatua. Maialen Lujanbiori kupela ba eskaintzeko aprobetxatu nahi izan zuten Bertso eguna. Hor Gu taldeko kideek Lujanbioren ibilbideko zenbait bertso gogoangarri batu zituzten gitarraz lagunduriko remix batean, eta jendearen errepikapen eta txalo artean hasi zuten hernaniarra omentzeko ekitaldia.
Bortzirietako bertso eskolaren sortzaile eta bertsolari entzutetsua izandako Manolo Arozenak izendatu zuen kupela, «historiako bertsolari onenari» eskainiz. Ondotik Lujanbiok bertso eder batzuez eskertu zuen egindako omenaldia. Bertan zeuden lagunek gogoz txalo eta kantu artean dastatu zuten Lujanbioren kupeleko sagardoa.
Tripak bete ostean afalosteko saio musikatua eskaini zuten Hor Gu taldeko kideek, Manex Pagola musikariaren laguntzaz. Linddurrenbordari eta Lesakari aitorpen bat egin nahi izan zieten eta kupeletako bertsolarien zenbait bertsoaldi gogoangarri abestu zituzten musikaz lagunduta. Mahai bueltako lagunak ere kantuan jarri zituzten eta sagardoak ez ezik, giro eder batek busti zuen Linddurrenborda. Sagardotegitik jaistean ere goizeko ordu txikitara arte luzatzeko aukera izan zuen nahi zuenak, Arrano ostatuan DJ Infernu aritu baitzen musikaz parranda girotzen.
Irudia bertsoa.eusetik hartua da.