Aurten 20 bat argitaletxek eta euskal eragilek parte hartuko dute: Euskal Itsasbazterra, Amaia Karrere, Waouche, Herria astekaria, Hatsaren Poesia, Dakit, Maiatz, Zortziko, Urrunaga, Euskal Herriko Mus Federazioa, Elkar, Urruñako Antzerki Eskola, Biaste Mitologia Elkartea, Maider Zigarroa, Lapurdi 1609, Gatüzain, Rafa Gorrotxategi xokolata-egilea eta Asisko Urmenetak. Antolatzaileen asmoa da, abenduko lehen igandean, urtero, Euskararen Egunarekin bat eginik, eta Durangoko Azokaren atarian antolatzen jarraitzea. Mementuko hirugarren edizioa dute. Joseba Aurkenerena Urrunaga elkarteko kideak aitortu digunez Urruñako herriari begira antolatzen dute. «Ez dugu anbizio handirik, ez da Durango, Sara edo Ziburun egiten dutena, Lapurdiko itsas-hegian liburuak argitaratzen dituzten 20 bat argitaletxe edo elkarteak gonbidatzen ditugu», argitu du.
Hala ere, Euskal Herrian gure kulturaren pizgarri izateko asmoa badu umiltasunez. Azokaren izenak XIX. mendearen erdialdean euskal kulturak bizi izan zuen loraldiari egiten baitio erreferentzia. «XIX. mendearen bukaeran euskal loraldia zabaldu zuen Antton Abadiak. Urruña epizentroa izan zen eta hortik Euskal Herri osora», oroitarazten du. Eta haien nahia da, oraingoan ere, loraldi berri bat lortzea Urruñan. Hirugarren urtea dute, eta azoka ondo errotzen ari dela pentsatzen dute.
Aurtengoan ere, Hego Lapurdiko inguruko argitaletxe eta sortzaileen lanak ezagutarazteko aukera emango du azokak. Xerar Urrutia urruñarrak bere Barne Galderak olerki-liburua aurkeztuko du bertan, olerki errezitaldi batekin. Eta hainbat animazio proposatuko dituzte haur eta helduendako. Antolatzaileek gaineratu dutenez, Kuxkuxtu txarangak goiz eta arratsaldez animatuko du azoka.
Abenduak 1, Loraldi Berri azokaren egitaraua:
- 10:00 - Harrera
- 10:30 - Makila Kixki txotxongiloa haurrendako, Maddi Zubeldia eta Bernadette Luroren eskutik.
- 11:15 - Xokolata dastaketa, Rafa Gorrotxategi sukaldariarekin. Xokolata egiteko, Euskal Herrian, XVI. mendean erabiltzen zen errezeta baliatzen du. Urririk.
- 11:45 - Ixabel Milletek euskal ipuin mitologiko bat kontatuko die haurrei.
- 12:15 - Xerar Urrutiaren Barne Galderak olerki-liburuaren aurkezpena. Olerki errezitaldia.
- 12:30 - Asisko Urmenetaren mintzaldia.
- 14:00 - Itxiera.
