Ama hizkuntza. Lehen hizkuntza, sortze hizkuntza, gure lehen hitzak egiteko erabili genuen lanabesa. 2007an Hego Euskal Herrian 108 hizkuntza mintzo zirela zenbatu zuen UN Etxearen ikerketa batek. Munduan, 7.100 hizkuntza inguru dira, denak ezagutzen ez ditugun arren. Asko eta azkar hiltzen dira zoritxarrez ere: urtean 14 eta 40 hizkuntza artean desagertzen dira.
Gurera etorriz, Irungo Txingudi Ikastolak 2021ean haien familien artean egindako neurketan 35 hizkuntza zenbatu zituzten. Kontinente orotako hizkuntzak ziren, erraldoi zein txiki. Ingelesetik Guaranierara, Wolofetik Mongolierara, eta noski, euskarara. Baita euskal mutuek mintzo dituzten keinuen frantses eta gazteleratik pasatuz ere.
Euskarak batzen du Bidasoaldea, euskarak batzen Hendaia, Irun eta Hondarribia. Frantsesaren eta gazteleraren itsaso handian isurtzen den erreka txikia da gure hizkuntza, baina bertze hamaika ama hizkuntza ere baditugu egunerokoan inguruan. Justuki, zenbat ama hizkuntza daude gure herrietan?
Ongi etorri Itsasadarrera.