Oharra: Podcast honek osasun mentala eta suizidioaren gaiak jorratzen ditu. Arriskuan bazaude edo berehalako laguntza behar baduzu, 3114 zenbakira deitu Ipar Euskal Herrian, 024 zenbakira Hego Euskal Herrian. Ez zaude bakarrik.
Gazteak eta osasun mentala. Osasun mentala eta gazteak. Luze-zabal solastu, idatzi eta kritikatu da azken urteotan gaiaz. Eztabaida zailak izaten dira usu, gazte batzuek egoeraren inguruko alarma deia egiten dutenean, heldu batzuek entzun ez edo erantzun oldarkorrak izaten dituztelarik. Ez da erraza osasun mentalaz aritzea, nork bere burua hein batean biluztea ekartzen baitu askotan. Datuak eta bizipenak nahasiz, eroso solasteko espazio bat irekitzen saiatuko gara.
2024ko Eusko Jaurlaritzaren datuen arabera, suizidoa da Euskal Autonomia Erkidegoan 15 eta 29 urte arteko gazteen arteko lehen heriotza kausa. Lehen arrazoia da espainiar estatuan ere, bigarrena frantses estatuan eta hirugarrena mundu mailan.
Frantziako Osasun ministerioaren arabera, 16 urteko mutilen %19k bakardadea sentitzen du, nesken artean %42k sentitzen duelarik. Adin horretako gazteen %24k, laurdena inguruk, bere buruaz bertze egitea pentsatu du azken 12 hilabeteetan. 2013tik 2023ra artean, bataz bestean bikoiztu dira datu hauek. Espainiar estatuan 2018an hasten da gazteen osasun mentalaren gainbehera: Covid pandemiak egoera nabari okertu duen arren, lehenagotik heldu da krisia. Datuak ilunak izan daitezke, baina zein da gure hurbileko egoera? Erradiografia hori egiten ahaleginduko gara gaurkoan.
Ongi etorri itsasadarrera.