Irungo Udalak Estebenea errekastoan bainua hartzea debekatu du, Dolores Salis kalearen bazterrean, eta Larreaundi auzoaren inguruetan. Albaitari batek sareetan salatu du, dagoeneko txakur bat hil dela leptospira bakterioak eragindako leptospirosia eritasun zoonotikoaren ondorioz. Eta gizakiarentzat ere arriskutsua denez, udalak prebentzio neurriak hartu ditu URA agentziak analisiak egin bitartean.

Irungo Udaleko Gizarte Ongizate arloak, 2018ko udatik aurrera urtero antolatzen duen 'Udan Gogoz' programa aurkeztu berri du. Sargia eta Antzaran parkeetan gimnasia eta yoga saioak aire zabalean egiteaz gain, uztaila eta abuztuan bina txango antolatu dituzte dohainik, inguruko historia, baliabide naturalak, etnografia eta aisialdia ezagutzeko. Palmera Monteron, berriz, turismo birtuala egiteko aukera ere eskainiko diete 60 urtez gorakoei.