Hezkuntza publiko duin baten aldeko aldarriari segida emango diote gaur eta bihar irakasleek. Greba ziklo honen laugarren greba eguna dute gaurkoa, eta Irungo eta Hondarribiko eskola publikoetan eragin handia izango badu, atzodanik Gasteizen, Lakuaren aurrean kanpaldia egiten ari dira ehunka irakaslek negoziazioa aldarrikatzen. Haizea Arbide, Steilas sindikatuko bozeramailearekin hitz egin dugu Antxeta Irratian. Joan den astean Eusko Jaurlaritzarekin sindikatuek egindako negoziazio mahaian hartu du parte.
Joan den asteburuan ere negoziatzeko eskatu zuten sindikatuek eta, hauen arabera, Eusko Jaurlaritzak ez du berriz eseri nahi izan. Steilas sindikatuak irmoki salatu du Hezkuntza Sailaren jokamoldea. «Joan den astean greba mobilizazioen atarian 10 orduko negoziazioa eman zen ordu txikietan amaitu zena, eta geroztik ez gaituzte deitu beste bilera batera, astelehenerako aurreikusia zegoen mahai teknikoa bertan behera geratu da ere, eta email baten bitartez jakinarazi digute hori» argitu digu Haizea Arbide, Steilas sindikatuko idazkari nagusiak. Bere ustetan, «Hezkuntza Saila mehatxuka dabil, greba utzi ezean negoziazioak ez dituela berriz ere aktibatuko esanez, eta badirudi betetzen ari dela».
Irakasleen lan hitzarmen berria izenpetzeko negoziazioak korapilatsuak izaten ari dira. Sindikatuak eta Hezkuntza Saileko ordezkariak lehengo asteko astelehenean bildu ziren azkenengoz, ez zuten lortu ados jartzea, eta grebei eustea erabaki dute. Halaber, euskal gobernuko Hezkuntza Sailak esan du grebek eragotzi egin dutela irakasleen lan hitzarmen berrirako negoziazioek aurrera egitea.
Hezkuntza Sailaren utzikeria
Alde horretatik, Eusko Jaurlaritzak 2010 urteaz geroztik, eta urtarrilean hasitako greba mugimendu honen aurrean agertutako «utzikeria» salatzeaz haratago, irakasleen lan baldintzak hobetzeko premiari buruz, Haizea Arbidek egiten duen argazkia sinplea da. «Argi daukagu errealitatea aldatzen doala gizartean eta eskoletan, eta irakasleok arreta zuzen on bat eta kalitatezkoa emateko hainbat gauza hobetu behar direla, egunotan oihukatzen den aldarrikapen nagusia lan-zamak jaistearena da batez ere, hainbat programa eta protokoloekin gehiegi burokratizatu delako irakasleen lana», azaldu du Antxeta Irratiko Zebrabidean irratsaioan. Gainerakoan, ikasle-ratioen apaltzeari buruz, Arbidek uste du lanak egin ahal izateko baliabide pertsonalak beharrezkoak direla. «Dauden ikasleak daudela, behar berezietarako edo errefortzurako baliabideak jarri behar dira», aldarrikatzen du.
Hau guztia ez da ari Hezkuntza Saila bermatzen. Steilas sindikatuko ordezkaria joan den asteko negoziazioan parte hartu zuen, eta agintariek balizko negoziazioari frenoa jarri diotela salatzen du: «Ez da lehenengo aldia hau borrokatzen dugula, atzeraka goazen seinale da, eta lan hitzarmena 2010etik iraungita dagoela esan beharra dago, urtez urte okerrera egiteko bide horri buelta eman nahi diogu, ez digute beste biderik utzi greba baino». Zentzu honetan, hainbeste greba egun deitu izanak irakasle askorengan zalantzak eragin ditzakeen arren, langileek erantzun aparta eman dutela azpimarratu du Arbidek, eta konfiantza egiten du negoziazioa aurrera eraman artean borrokan jarraitu beharra dagoelako.
Bidasoaldeko irakasleen kontzentrazioa
Gure eskualdeari dagokionez, joan den asteko hiru greba egunek izandako eragina nabarmena izanik ere, Irungo San Juan plazan Irungo irakasleek aurreneko aldiz antolatutako kontzentrazio amankomuna izan zen nobedade nagusia. Bertan parte hartu zuten Hondarribiko Talaia ikastetxeko hainbat irakaslek ere. Eta aste honetan, deialdi zabala luzatu dute berriz. Bihar, apirilak 2an, goizeko 11:00etan Zabaltza plazan elkartuko dira Bidasoko irakasleak “Kalitatezko hezkuntza baten alde” lelopean, eta ikas-komunitate osoa interpelatu dute, hezkuntza publikoaren defentsan guraso eta ikasleak ere borrokara batu daitezen.
Momentuz, Txingudi Ikastolako Guraso Elkartea izan da familien partetik grebarekin bat egin eta irakasleen aldarrikapenak publikoki babestu duen familiei lotutako eragile bakarra. Irungo 1.200 ikasle baino gehiago eskolatzen dituen eskola publiko honetako gurasoen elkarteak joan den astean ohar bat plazaratu zuen sare sozialetan haien irakurketa eginez.
Argazkia: Argia
