Joan den astean San Juan plazan egin zuten ikastetxe guztietako irakasleen aurreneko mobilizazio amankomuna. Eta indarrak biltzeko behar horretan, hezkuntza publikoak gizarte osoa hunkitzen duen heinean, agintariei presio emateko gurasoak ere aktibatzeko, eta ikas-komunitate osoa borrokara batzeko deia egiten dute gaurkoan. «Eskola denok osatzen dugu, irakasle, ikasle eta familiek ere, agian iritsi da unea gizarte osoa mugitzeko», pentsatzen dute irakasle askok.
Joan den astean Irungo Txingudi Ikastolako Guraso Elkarteak plazaratu zuen oharraren hari beretik, zenbait irakaslek gurasoak interpelatu dituzte, sindikatuek azken orduetan borroka fase berri batera eramateko beharra azpimarratu baitute. Irungo Toki Alai ikastetxeko irakasle batek aitortu duenez, «badirudi irakasleoi ez gaituztela aintzat hartzen, baina Eusko Jaurlaritzak askotan erakutsi du gurasoen ezinegonaren aurrean erabakiak azkarrago hartzen dituela».
Izan ere, irakasleen aldarrikapenak 2010az geroztik galdu duten erosahalmenaren %23az haratago doa. Bereziki ikasleen beharrei erantzuteko denbora gehiago eskatzen dute denek, baita aniztasunari erantzuteko baliabideak ere. Ikasle-ratioak apaltzea, prestaketa eta koordinaziorako ordu gehiago eta burokrazia eta ugaritu dizkieten protokoloetako txostenak betetzen ordu gutxiago, ordezkoen lan baldintzak hobetzea, edozein langileren modura osasun-azterketak egiteko eskubidea bermatzea, edota Hezkuntza Sailak ikastetxe sare publikoan benetako inbertsioak egin ditzala.
Gogoratzen dutenez, instalazioak berritzea ezinbestekoa baita, eta «Irungo eskola publiko askoren egoera prekarioa da oso, txiki geratu direnak, zaharkituak eta mantenu falta nabarmenarekin».
Mobilizazioa akordioa lortu arte
Horiek hala, eta akordiorik lortuko ez bada, greba mugimendua indartzeko aukerari ez diote irakasleek uko egiten. «9 greba egun egin ditugu dagoeneko, langile bezala kalte handiak pairatuz eta eskolaren ikasturteko plangintza betetzeko ere arazo handia suposatuko du dagoeneko, baina borrokan sendo gaude, beraz jarraituko dugu lortu arte», argitu dute.
Zentzu horretan, urtarrileko grebaldiaren ondotik, azken bi asteotan greba ziklo honen bosgarren eta azken greba eguna izan dute gaurkoa irakasleek. Baina Hezkuntza Sailak 2010etik berritu gabe duen irakasleen lan hitzarmenaren negoziazioa korapilatsua bilakatzen ari da. Eta joan den asteaz geroztik sindikatuek ez dute Hezkuntza Sailaren proposamen berririk jaso. Atzo Steilas sindikatuko bozeramailea Haizea Arbidek Antxeta Irratian aurreratu zuenez, «gure aldarrikapenek erantzun egokia jaso arte borrokan jarraitzeko erabakia hartua» dute.
Ikasleak erdigunean jartzeko beharra
Gaur Irunen egindako mobilizazioan Bidasoko irakasleek argi utzi dute sindikatuek haien lana egiten duten bitartean, «lehertu egin den egoera honen aurrean» irakasleek «funtzio publiko garrantzitsu bat betetzen dutela» eta «hezkuntza etorkizuneko gizartearen aldeko apustua den heinean, ikasleak erdigunean jarriko dituzten neurriak baino ez dituztela onartuko». 40 urteko eskarmentua duen Hondarribiko Talaia ikastetxeko irakasle batek azpimarratu du ere, gizartea nabarmen aldatu egin dela azken urteotan, eta irakasleak gainezka dabiltzala. «Aniztasun handi hori kudeatu ezinik gabiltza, gero eta gehiago eskatzen zaigu baina gero eta baliabide eta dedikatzeko ordu gutxiagorekin, osasungintzan bezala, hezkuntzan ere aspaldi ari gara murrizketak salatzen».
Inbertsio eskasaren ondorioz, Irungo eskola publikoetako instalazioen egoera prekarioa ere salatu dute irakasleek. Haien aburuz, kalitatezko hezkuntza eskaintzeko baldintzarik ez du Hezkuntza Sailak bermatzen. Eta Txingudi Ikastolako irakasle zenbaitzuk gogoratu dutenez, «borondate kontua da, dirua egon badagoelako». Izan ere, atzo bertan jakinarazi zuen Eusko Jaurlaritzak, buletin ofizialean argitaratuta, itunpeko eskoletako instalazioak hobetzeko 15 milioi euroko diru partida onartu berri duela.
