Aste honetan Oihane Cabezas Basurko AZTI erakundeko itsas biologoa gonbidatua izan dugu Antxeta Irratian, Kantauri Itsasoaren kutsadura eta hondakin plastikoen gainean egiten ari diren azken ikerketa ozeanografiko eta zientifikoei buruz xehetasunak emateko. Baina dakizuen bezala, azken urteetan, Surf Rider fundazioak, Recicla-Birziklatu elkarteak, Plaiaundiko Parke Ekologikoaren Eko-Patruilak edota Hendaiako CPIE Euskal Itsasbazterra erakundeak ere, gure kostaldearen garbiketa ekimen herrikoi anitz antolatu dituzte azken aldian. Eta urtero urtero, plastikoak eta hondakinak biltzen dituzten arren, garbiketa bakoitzean topatzen dituzte zorigaiztoko hondakinak.
Hendaian, hain justu, martxoaren 15ean antolatuko duten Udaberriko Garbiketa Handia egin aitzin, 52kg hondakin jaso dituzte. Otsailaren 16ean CPIE-IEZI erakundeak Txingudiko Badian antolatuta, 30 lagunek urteko lehen bilketa egin zuten, eta ordubetean bildutako hondakinen gehiengoa, pisu eta bolumen aldetik, plastikoa izan zen: 21,95 kg. Hondakin honen jatorria zein izan daitekeen argitzeko, produktuen marka ezberdinen zerrenda egin zuten antolatzaileek. CPIE erakundeko Ganix Grabiersek jakinarazi duenez, haien artean 16 botila bildu dituzte, eta Lays, Haribo, Onyx, Huesitos, Facundo, Doritos, Durex edo Mercadona markako produktuen poltsa edo ontziak.
Bestalde, 7,85 kg beira, 2,9 kg manufakturako egurrak, 2,245 kg oihal eta jantziak, 4,2 kg metalak eta 12 kg soka jaso zituzten. Ohikoa duten bezala, naturatik berreskuratutako zaborra bereizteko lanak egin zituzten, baita sailkatutakoa hondakindegira eraman ere.
Udaberriko Garbiketa Handia
Ekimen txiki hau kostaldean dagoen zabor kopurua testatzeko besterik ez da izan. Izan ere, CPIE Euskal Itsasbazterra erakundeko ingurumen teknikaria, Jon Frahierrek gogoratu digunez, martxoaren 15ean, Udaberriko Garbiketa Handia antolatuko dute, goizeko 9:30etik 12:00etara. Tren geltokiaren gibeletik hasi eta hondartzako azken muturreraino, Hendaiak dituen 10 bat kilometro ibai eta itsas bazterrean zehar egingo dute garbiketa auzolanean eta taldeka. Urtero hainbat itsas-kirol elkarte, eskola eta bestelako eragileek bat egiten dute ekimenarekin, eta herritarrei batzeko deialdia luzatu diete. Batetik, urtero ehunka kilo hondakin naturatik ateratzea lortzen delako, baina familian parte hartuz gero ere, haurrek errealitate honen kontzientzia hartzeko baliagarria delako.
Garbiketa honetan boluntario izateko izena eman behar da, +33 (0)5 59 74 16 18 telefonora deituz edo internet bidez hemen.
