Martxoko osoko bilkuran udal ordezkariek hartutako erabakien artean, Hondarribiko Jaizkibel mendiko pistak eta baso-bideak kontserbatzeari eta ibilgailu motordunekin erabiltzeari buruzko ordenantzari hasierako onarpena emateko proposamena izan da esanguratsuenetako bat. Udalak "Zaindu Dezagun Jaizkibel" lelopean, honi buruzko udal ordenantza idazteko prozesuaren kontsulta publikoan herritarren iritziak jasotzeko epea otsailaren 24an itxi zuen. Eta hasierako onarpena eman zaio atzo.
Garoa Lekuona arloko zinegotziak argitu du, otsailean zenbait bilera informatibo egin zituela herriko nekazal auzoetako bizilagunak informatzeko. Nolanahi ere, «azken urteetan asko ugaritu da ibilgailu motordun mota guztien erabilera, pistetan eta baso-bideetan, eta horrek arriskuan jartzen du pisten eta bideen osotasuna eta kontserbazioa ez ezik, mendiaren beraren natura-ondarearen balioak ere».
Gogoan hartu behar da, Jaizkibel mendia Natura 2000 Sarearen baitan, Kontserbazio Bereziko Eremu gisa sailkatua dagoela. Baina bere formazio geologiko eta biodibertsitate aberatsak, bisitarien erreklamu diren aniztasun handiko paisaiak eta kultura ondare garrantzitsuak gordetzen dituenez, bisitarien mugitzeko eskubidea mendiaren babesarekin uztartu beharra dago. Betiere, mendia babesteko lanetan diharduten zerbitzuen azpiegituretarako, larrialdi eta babes zibileko zerbitzuetarako, zein mendian jabetzak dituzten herritarren igarobideak bermatuz. Helburu horrekin garatu dute pista eta bide horietan ibilgailu motordunen erabilera arautzeko udal ordenantza.
Atzo hasierako onarpena eman zion udal gobernuak. Izan ere, ABOTSANITZ eta EH BILDUk baiezkoa bozkatu zuten bitartean, EAJ eta PSE-EE abstenitu egin ziren. Hurrengo urratsa atzoko onarpena Gipuzkoako Aldizkari Ofizialera bidaltzea izango da, eta publikatzen den hurrengo egunetik 30 eguneko epea zabalduko da proposamenak egiteko.
Adostasunik ez Mendeluko Open Gelaren kontratazioan
Bestalde, Mendelu auzoaren berritze integralerako bulego teknikoaren arreta, informazio eta kudeaketa zerbitzuaren kontratazioa onartu zuten (aurten 90.000 euroko aurrekontua onartua dago horretarako), EAJren kontrako bozkarekin. Mendeluko Open Gela «beharrezkoa» dela azpimarratu dute jeltzaleek, baina «Abotsanitz oposizioan zegoenean esaten zuena eta orain justu aurkako» delako bozkatu zuen kontra oposizioko talde nagusiak. EAJk dioenez, «zerbitzua azpikontrata bidez kudeatzea kontraesan bat da, oposizioan ez zuelako begi onez ikusten Udalaren jardunean».
Era berean, 2025 urterako udal plantilla organikoa eta lanpostuen zerrendaren aldaketa onartzeko proposamenean ere, udal gobernuak ez zuen adostasunik lortu. Alde bozkatu zuten ABOTSANITZ eta EH BILDUk, eta aurkako bozka eman zuten EAJ eta PSE-EEk. Oposizioak ez du begi onez ikusi «Udaltzaingoko ofizial eta ofizialorde lanpostuak betetzeko modua». EAEko beste administrazio batzuei eta Ertzaintzari irekitako izendapen askea ezarri beharrean, beste modu batzuk daudela defendatu dute. Hala ere, oposizioko taldeek aitortu zuten udal langileak egonkortzeko udal gobernua egiten ari den lana poztekoa dela.