Igor Enparan Araneta alkateak adierazi du aurrekontu hauen helburua «herritarren beharrak erdigunean jartzea, auzoen garapena sustatzea eta jasangarritasuna erdigunean kokatzea» dela, eta inoizko aurrekonturik handiena izanik, «ekonomikoki orekatua» dela. Era berean, aurrekontua «gardentasunean eta parte-hartzean oinarrituta» landu dela aditzera eman du alkateak. Eta oposizioaren eskaerari jarraituz, negoziazio formalerako espazioa ireki dela gogoratu du.
Ezadostasunak agerian
Horren emaitza izan da, PSE-EEren 8 proposamen jaso direla, 408.550€ko aurrekontuarekin. Iosu Alvarez sozialisten bozeramaileak, aldiz, argi utzi du bere taldeak ikuspegi eraikitzaile batetik hobekuntzak egiteko proposamenak aurkezten jarraituko duela. Baina «mugikortasuna, aparkaleku zein etxebizitza arazoari aterabidea emateko gaitasunik ez duen aurrekontua» dela azpimarratu du. Hala ere, gazteentzako etxebizitza-laguntzak edota Santiago kaleko igogailua onartu du udal gobernuak, eta kreditu aldaketan onartu ez zaizkien proposamenak negoziatzen jarraituko duela iragarri du Alvarezek.
EAJ-PNV udal taldeak bere aldetik, 17 proposamen egin zituen, baina negoziazio prozesutik aldendu egin zen. Hala ere, udal gobernuak euren bi proposamen txertatu ditu: Etxebizitza arloko teknikari bat kontratatzeko aurrekontua eta elkarte zein kirol klubentzako dirulaguntzen igoera, eta guztira 123.958€ jasotzen dira horretarako. Jeltzaleek joan den astean iragarri zuten kontrako bozka emango zutela. Eta EAJren bozeramaileak Gonzalo Carrionek aurrekontuak «gardenak eta errealistak» direnik ukatu dio alkateari. Eta hiri-eredu ezberdinak dituztela argudiatu du kontra bozkatzeko. Lur azpiko aparkalekua jarri du horren adibide, udal gobernuak Zezen plazan defendatzen duen bitartean, jeltzaleek Jabier Ugarten ikusten dutelako egokiago.
Era berean, Udal Aurrekontu Parte-hartzaileetarako 200.000 euro bideratu izana, Abotsanitzek oposizioan zegoenean aldarrikatzen zuenarekin bat ez datorrela salatu dute jeltzaleek. Carrionek «eskaparatezko parte-hartzea» egiten ari direla leporatu dio udal gobernuari, aurrekontu osoaren %0,57 aurrekontua besterik ez dutelako horretara bideratu, oposizioan gutxienez %2 eskatzen zutenean.
Bestalde, gobernukidea den EH Bilduk egindako 13 proposamenetatik sei ekarpen jaso dira aurrekontuetan, 22.000 euroko partidarekin. Hala nola Alardeari buruzko parte-hartze prozesua garatzea, zaintzaileen zaintzarako dinamikak abiatzea, haur ludotekaren azterketa edo jarduera ekonomikorako bi udal lokal egokitzeko partida.
Alde horretatik, «atzeratuta dabilen udala» dela, eta Agintaldi Plana betetzeaz gain «egunean jartzeko lanetan» ari direla azpimarratu du Garoa Lekuonak. Bere ustez, etorkizuneko beharrei erantzuteko tresna egokia da 2026ko udal aurrekontua.
Partida eta inbertsio nagusiak
Oposizioko udal taldeen abstentzio eta kontrako bozkaren aurrean, Igor Enparan alkateak bere partetik, argi utzi du aurrekontuaren ikuspegi soziala. Guztira, 14 milioi euro bideratuko direlako ongizate-politiketan. Hala nola, Gizarte Zerbitzuetan, hezkuntzan, gazterian, irisgarritasun-neurrietan, dirulaguntzetan, komunitate-dinamizazioan eta osasun emozionalerako programekin lotutako ekintzetan, besteak beste.
Inbertsioei dagokienez, 300.000 euro bideratuko dira Hondartza Kiroldegian suteak kalteturiko sauna-eremua berritzeko. Pasaia kalea berrurbanizatzeko ia 2 milioi euroko (1.948.719 euro) inbertsioa, eta Mendelu auzoan uholde arriskua murrizteko muino bat sortzeko 507.000 euro onartu dituzte. Dena den, proiektu zehatzetatik harago, negoziazioetan emandako ezadostasunak argitu nahi izan ditu alkateak.
Bestalde, eta 35 milioi euroko aurrekontu batean 200.000 euro badira ere, aurrekontu parte-hartzaileek oposizio taldeen aldetik eragin dituen kritikak argitu ditu Enparanek. Helburua «herritarrek udal erabakietan parte hartu eta demokrazia hobeago bat lortzea» izan dela nabarmendu du, eta batzuen ustez gutxi diren 200.000 euro horiek, «adituen arabera gehiegitxo zela» azaldu du. Gogoan hartuta, prozesua egituratzeko Gipuzkoako Foru Aldundiaren laguntza jaso duela udalak, formakuntza barne. Alkatea harro azaldu da azaroaren 26an amaitu zen prozesuaren lehen fasearekin, izan ere, herritarrek egindako 140tik gora proposamen jaso dituzte.
Datozen egunetan aurrekontuak xehetasun guztiz kontsultatzeko aukera izango da www.hondarribia.eus webgunean.
