Eguzki talde ekologistak Bidasoa ibai eta Irungo erreka bazterretan dauden baranden azpikaldean sareak jartzeko eskatu dio Irungo Udalari. Argitu dutenez, sare hauek, txapa galbanizatuzkoak dira eta hondakin uretara erortzea sahiestuko luke. Gaur egun itsasoan amaitzen duen zaborraren erdia baino gehiago lehorretik datorrela ondorioztatu dute AZTI erakundeko itsas-biologoek ULISES proiektuan egindako azken ikerlanetan. Eta Eguzki taldeko kideek diotenez, «batzuetan nahi gabe edo istripuz erortzen zaizkigun hondakinak dira, baina gehienetan hondakinak lurrera inolako lotsarik gabe botatzeko ohitura gure artean oraindik oso sustraituta dago, eta hondakin hauek haizeak ibaietara daramatza, eta azkenean itsasoan bukatzen dute».
Horrelako baranden azpitik urtero hamaika hondakin iristen baitira uretara: latak, tabako-kaxak eta beraien plastikozko bildukinak, zigarrokinak, paperezko mahai-zapiak, plastikozko poltsak, plastikozko botilak zein beirazkoak, azukre koxkorren bildukinak, eta zernahi hondakin.
Irungo Udalari luzatu dioten eskaera, beste hainbat herritan eraginkorra dela frogatu egin dela azpimarratu du talde ekologistak. Argitu dutenez, Urola bailarako hainbat herritan instalatu dituzte halakoak dagoeneko, Zestoako industria gune batean, Zumarragan, Urretxun, Azkoitian eta Azpeitian. Urolatik kanpo, berriz, Pasaian, Oiartzunen, Errenterian, Hernanin, Elgoibarren, Tolosan, Ordizian, Oñatin eta Lazkaon ikus ditzakegu, eta beste udal batzuk horiek jartzea aztertzen ari dira ere. «Gure ibaien eta kosten mesedetan honelako neurri ekologikoak hartzeari berebiziko garrantzia ematen diogu», aldarrikatzen du Eguzki taldeak.
Dena dela, Eguzkik sareak jartzeko proposatzen badu ere, «hondakin onena dela sortzen ez dena» dela gogoratzen dute. Eta ibai eta itsasoari dagokienez ere, hondakinik onena uretara iristen ez dena dela sinetsita, itsas-hondakinen arazoa arinduko lukeen neurri sinple hau har dezala galdegin diote Cristina Laborda alkateari.
