Klimaren ondorioak arintzeko Ekoetxea Erronkari ekingo diote Plaiaundin

Ekoetxea Txingudik Klimaren Aldeko Jaia antolatu du heldu den igandean. "Ekin orain!" lelopean eta klima aldaketaren ondorioak arintzeko denok gure ondar alea jar dezakegula adierazi nahian, mezu baikorra helarazi nahi dute antolatu duten egun osoko jaialdian. "Oraindik garaiz gabiltza" dute erronkaren goiburu, eta urriaren 19an, goizeko 10:00etan hasita, hamar bat jarduera proposatuko dituen egun osoko egitaraua proposatuko dute, “Ekoetxea Erronka” ekimenaren lehen urratsa egiteko.

Aurrenekoa izango da, izan ere, Eva Montoya, Ekoetxea Txingudiko koordinatzaileak azaldu digunez, azaroan hondakinen arazoa eta abenduan mugatua den lurzoruen defentsa izango dituzte beste hainbeste jaialdietan hizpide. Montoyak argitu du, familia osoarentzat prestatutako jarduera, jolas, bisita gidatu, ibilbide eta sorpresa ugari dituen egun berezia prestatu dutela. 

Horretarako, Plaiaundi Natur Parkean bisita gidatuak ez ezik, argazki eta marrazki mosaikoak, zazpi postu izango dituen Klimaren Azoka, tokiko produktuen dastaketa eta beste hainbat hitzordu izango dira dituzte Plaiaundiko Ekoetxea Txingudin eta bere atariko atsedengunean. Jarduera guztiak muxu truk izango dira, baina zenbaitzuetan (ikusi behean) aldez aurretik izena eman behar dela argitu dute antolatzaileek. «Gure helburua gizartea sentsibilizatzen jarraitzea da, eta kasu honetan, klima aldaketak oro har, baina espresuki Plaiaundiko hezegunea bezalako marearteko gune babestuetan izan dezakeen eraginaz hausnartzea», azaldu digu Ekoetxea Txingudiko arduradunak.

Alde horretatik, Plaiaundiko harrera eta erakusketagunearen aurrean egun osoan zehar AsteKlimaren barruan ezarriko Klima Azokaren zazpi postuetan, «gure egunerokoan egin idtzakegun keinu txikiek eragin handia izan dezaketela» erakutsi nahi dute, «gure esku dauden bizikleta mugitzea edota energia kontsumo arduratsua egitea bezalako keinuak». 

Klimaren Aldeko Jaia Ekoetxea Txingudin ospatuko duten bezala, EAEn Eusko Jaurlaritzaren esku dauden beste bost natur eremu babestuetako ekoetxeetan ere egingo dute. Urriaren 19an bertan, Ekoetxea Urdaibai eta Meatzaldekoan. Eta urriaren urriaren 26an Ekoetxea Azpeitia eta Añana-Sobronekoan ere. 

Era berean, Euskadiko ekoetxe guztiek bat eginik, QR eta Internet bidez, udazken honetan Klimaren Aldeko 10.000 konpromiso biltzeko "Ekoetxea Erronka!" sinadura kanpaina ere antolatu dute. Honekin bat egiteko, edota aipatu ditugun igandeko hitzorduetan izena emateko ekoetxea.eus atarian egin dezakezue, muxu truk.

Sinaduren kasuan, hemen egin daiteke oso modu errazean. Montoyak azaldu duenez, mundu hobe baterako klik eginez, edota igandeko Klimaren Aldeko Jaian antolatu duten Fotomosaikoan parte hartuz ere, keinu txikiak egiteko konpromisoa hartzean datza, eta parte-hartzaileen artean nekazal-turismo jasangarrietarako gauak zozkatuko dituzte.