Irungo Udalak Irunbus zerbitzuaren kontratua esleitu berri dio Semura Bus S.L. enpresari. Grupo Cuadrabus enpresaren filiala da, eta Zamoran (Gaztela eta Leon) du bere egoitza soziala, baita hango hiri-garraioa kudeatu ere. Euskal Herrian, aldiz, Tolosa eta Bilboko Etxebarrin ere bideratzen ditu enpresa taldeak.
Irungo Udalak kontratua lehiaketara atera zuen 3,8 milioirengatik joan den otsailean, eta azkenean 400.000 euro inguru merkeago esleitu du 20 hilabeterako. Cristina Laborda alkateak argitu duenez, autobus elektrikoen flota gorde eta kargatzeko pabiloiak erosi ditu udalak, eta hauek egokitzeko lanak amaitu bitartean egin dute kontratua. Gerora, egoera aldatu daitekeela aintzat hartuta.
Nolanahi ere, azken hamarkadatan Irunbus zerbitzua AUIF S.L. enpresak kudeatu badu, oraingo kontratu berriak udalak aurreikusiak zituen hainbat hobekuntza ahalbidetuko ditu. Batetik, Gautxori zerbitzuaren maiztasuna azkartuko da, eta orduerokoa izatetik, ordu erdierokoa izatera pasako da Behobia eta Landetxa-Katea auzoko zerbitzuetan. Hau bi hilabeteko epean sartuko da indarrean, eta beraz, sanmartzialetarako martxan egongo da.
L5 linea berriaren "zortzi" formako ibilbidea
Hala ere, berrikuntza nagusia udan, L5 linea izango da. Udalak argitu duenez, Irunbuseko gainerako lau lineek egiten duten ibilbidearen kontrako noranzkoan ibiliko da, hau da, hiria Iparraldetik Hegoaldera zeharkatuko du. Fermin Calbeton kaleko geltokia izango du abiapuntu, eta ia 5 kilometroko ibilbidea egingo du. FICOBA-Kostorbe inguruak, Elizatxo auzoko gunerik garaiena eta Mendibil auzunea lotuko ditu, bertako bizilagunen eskaera historiko bati erantzunez. Tartean, hiriko ardatz nagusietatik pasako da, San Juan plaza, Colon ibilbidea, baita Gipuzkoa eta Iparralde hiribideetatik ere.
Udalak argitu duenez, «zortzi formako ibilbidea egingo du zirkularra izan beharrean, Elitxun edo Mendibilen autobusa hartzen dutenek, erdigunera joateko ibilbide osoa egin behar ez izateko». Ibilbidea zehazteko azterketa egin zuen Mugikortasun arloko teknikariak eta Borja Olazabal zinegotziak aditzera eman digutenez, «bereziki garrantzitsua iruditzen zitzaien Mendibil auzotik igarotzea, eta Lapitzeko bizilagunei zerbitzu zuzena ematea». Hortaz gain, Ficobarekin lotuko du autobusak, azoka egunetan edota Real Unionen partidetara hurbildu ahal izateko ez ezik, Ficobako aparkalekuaren funtzio disuasorioa indartzeko aukera emanez.
Gogoratu beharra dago, Mendibil auzunean hainbat egokitzapen egin behar izan dituztela autobusak kale estuetatik pasa ahal izateko. Eta berez, L5 linea hau 2025ean indarrean sartzea aurreikusia zuela udalak. Baina kontratu berriaren lehiaketa atzeratu denez, orain jarriko dute martxan.
