Bideoak

Bixente Lazkano urruñarraren Orchidée behia Pariseko saloian lehiatuko da ostegunean

Aimar Lopez 2025ko ots. 24a, 16:00

Urruñako hiru behi lehiatuko dira aurten Pariseko Laborantza Saloian: Beñat Expositoren bi Prim’Holstein gaur, eta Bixente Lazkanoren Akitaniako Blonda bat ostegunean. Urruñako lehiaketetan hasi, departamendu eta estatu mailakoetan jarraitu, eta garaikur gorenaren bila bihar hartuko dute Pariseko bidea Lazkanok eta Orchidéek.

Dozena bat behi ditu Bixente Lazkanok Urruñako etxaldean, Akitaniako Blondak gehienak, baita Limousine bat ere tartean; “maskota” dela dio irri artean hazleak. Behien umatze garaia Pariseko lehiaketaren prestaketarekin batu zaizkio Lazkanori, baina kontent eta bero egin digu harrera, egun guttiko aretxeak begi baten xokoan, Orchidée bertzean, eta Lagun txakurra pauso orori jarraiki.

Sei urteko “lan handia” izan da behia lehiaketetarako prestatzea. Txikitatik behi miga ederrenak identifikatu behar direla azaldu du Lazkanok, eta eder mantentzeko elikadura zaindu bertzeak bertze. Hain zuzen ere, Orchidéeren kasuan, elikatzea delikatua izan da, eta “teknikari batzuk atzeman” behar izan zituzten, behiak zituen arazoak ulertu eta behar zuena plantan emateko. Azken urteetan, Pirinio-Atlantikoetan behi ederrenaren saria eskuratu du bere kategoria, eta berriki, frantses estatu mailan hirugarren lekuan kausitu zen.

Lehen aldia izanen du Bixente Lazkanok Pariseko Laborantza Saloian lehiatzen. Ofizioz laboraria ez denarentzat denbora inbertsio nabaria da, baina gogoz hartuko du astearte arratsaldean Pariserako trena. Behiak berriz, Ipar Euskal Herriko eta Landetako bertze hainbatekin batera, kamioi batean eginen du Pariseko kanpoaldean den erakustazokarako bidea.

Ortzegunean igo beharko dira Lazkano eta Orchidée Pariseko Saloiko lehiaketen Ring Handira, bost urtetik gorako Akitaniako Blonda emeen kategorian, bertze lau behirekin ariko dira lehian.

Jarraian entzungai da Bixente Lazkanorekin egindako elkarrizketa osoa.