Urriaren 27an, Alardeaz hausnartzeko elkarrizketa publikoa antolatu zuen Antxeta Irratiak herritarren eta Estitxu Urtizberea alkateordearen artean. "KonponBIDEAN" lelopean, Kultur Etxean herritarren galderak ere erantzun zituen udal ordezkariak ordubeteko saioan. Herrian aspaldi «inposatu diren idatzi gabeko arauak» eta udalak betearazi beharreko «XXI. mendeko legeak» izan zituen hizpide. 1996az geroztik gotortutako gatazka konpontzeko «arrazoia eta emozioen arteko krisia kudeatu» eta duela hiru urte abiatu duten «elkarrizketaren bidean sakondu» beharra dagoela dio.