Bixente Lazkano trenez eta behiak kamioiez egin dute Pariserako bidaia, itzulerakoa aldiz, ezin zoriontsuagoa izango dute. Aurreneko aldia zen beretzat halako lehiaketa handi batean parte hartzen zuela. Baita sei urteko Orchidée behiarentzat ere. Baina estreinakoan, lehen saria eskuratu du. «Pisurik ez zuen hartzen eta elikadurarekin arazoak» izan zituela kontatu zigun Lazkanok Pariserat abiatu aitzin, baina adituen laguntzari esker bideratu zutela, eta «forman» zela.
Agerikoa izan da hori Pariseko Laborantza Saloiko epaileen arabera. Lazkanok bere etxaldean dauzkan dozena bat Akitaniako Blonda behien artean hautatua da, Orchidée, eta prestakuntza prozesu luzea darama konpetizioko behi bilakatu arte. Urruñako lehiaketan hasi zen sariak biltzen, gero Pirinio Atlantiko Departamenduko lehiaketan lehen postua eskuratu zuen, eta berriki frantses estatu mailakoan hirugarren sailkatu zen. Aldiz, Pariseko Laborantza Saloia nazioarte mailako bada ere, frantses estatu mailako sari gorena da. Ohore handikoa.
