Iaz, Hendaian eta bi orduan 322 kilo hondakin bildu zuten 185 lagunek. Aurten 240 boluntariok parte hartu dute 17. urtez CPIE-IEZI Euskal Itsasbazterrak erakundeak herriko etxearekin batera antolatutako Udaberriko Garbiketa Handian, eta 334 kilo hondakin jaso dituzte Txingudiko badian, Bidasoa ibai bazterrean eta Hondarraitz hondartzan. Bilketa lanak behin amaituta Txingudiko badiaren itsas-zentro nautikoan bereizi zituzten hondakinak, eta bertan atera dituzten ondorioen artean, plastikoen eta zigarrokinen arazoa nabarmendu dute antolatzaileek.
Izan ere, bildutako hondakinetatik 254 kilo plastikoak, poliestirenoak eta ohiko zaborrak ziren bitartean, ustiatutako 46 kilo egur eta milatik gora zigarrokin jaso zituzten. Kasu honetan, pisu aldetik hondakin nabarmena ez bada ere, 100 produktu toxiko baino gehiago dituela oroitarazi dute, eta Bidarteko Tree6Clope elkarteak informazio puntu bat jarri zuen bereizketa gunean. Elkarte honek zigarro-muturrak balorizatzeko lanak hartzen ditu, eta aurki Urruñako herriko etxeak abian jarriko duen zigarrokinen apaltzeko plan estrategikoan ere parte hartuko du.
CPIE-IEZI erakundeak Hendaiako garbiketan aritu diren 240 boluntarioak eta parte hartu duten herriko elkarte eta eragileak eskertu ditu egindako lanagatik. Besteren artean, Hendaye Bidassoa Surf Club, Endaika, Les Voiles d’Hendaye, Les Corsaires, Recicla-Birziklatu, Odol Emaileen Elkartea, Hendaiako Hiritar Asanblada, Belharra-Hendaye Scout taldea edota Explore Océan aritu ziren.
Urruña eta Ziburun, barnealdeko garbiketak
Hendaian eskarmentu handia dute udaberri oro garbiketa hau antolatzen. Aldiz, aurtengoan Ziburu, Urruña eta Donibane Lohitzuneko herriek ere bat egin dute ekimenarekin, CPIE-IEZI erakundeak gidaturik betiere. Kasu hauetan, indar bat egin dute itsasoan bukatu ohi duten hondakinen iturrira joaz. Urruñarrek Ibardinen egin dute garbiketa, eta Ziburun 100 lagun inguruk parte hartu zuten Marinel auzotik abiatuta, herri barnea garbituz.
Jean Mixel Dirassar hautetsiak argitu du, kaleak garbitzen badira ere, beti topatzen direla plastikoak eta bereziki zigarrokinak, berandu baino lehen itsasoan bukatuko dutenak. Garbiketa burutzearekin batera, hainbat familia hurbildu zirenez, ingurumenaren zaintzari buruz sentiberatzeko ekimen praktikoa dela azpimarratu dute herriko etxe eta eragile parte hartzaileek.