2025eko azaroaz geroztik Aparkalekua Orekaz antolatu proiektua garatzeko prozesuan Udal Batzorde politiko eta teknikoetan «inoiz ez da prozeduraren kontrako iritzirik jaso». Horregatik hain justu, Estitxu Urtizberea Hirigintza udal ordezkariak harrituta azaldu da, atzo Hondarribiko EAJk prozedura geldiaraztea eskatu duela ikustean. Jeltzaleek diotenez, «askok ez dakite zehazki zer neurri aurreikusten diren», eta batzordeetan ez bezala, prozedurarekin bat ez datorrela aditzera eman du EAJk «ez delako nahiko izapidetzea hasi eta gero alegazioak aurkezteko aukera ematea».
Hala ere, Udal Gobernuak gaur aurreikusia zuen Hasierako Onespena gelditzea erabaki badu, «azken asteetan sare sozialetan informazio desitxuratua zabalduz sortu den zalaparta eta ezinegona ikusita» izan da. Urtizbereak azaldu duenez, agintaldi honetan «ohituak gaude urte askotan herrian abordatu ez diren gaiak abordatzen ditugunean zalaparta interesatua sortzen dela udalaren jarduera oztopatzeko». Salatu duenez, hala gertatu da terrazen ordenantzarekin edota alardearen gaia jorratu nahi izan denean ere.
Oraingo honetan «sare sozialen bidez herritarren artean ezinegona piztea lortu dute», kexu da Hirigintza ordezkaria. Baina Udal Batzordean alderdi guztiek egindako lan teknikoa babestu zutela gogoratu du, eta inork ez duela bi urte hauetan kontrako iritzirik eman.
Partaidetza eta informazio prozesu zabala
Udal Gobernuak «legeak agintzen duena baino partaidetza handiagoarekin» osatutako zirriborroa dela gogoratu du, izan ere, hasieratik aparkalekuen ordenantza berria «kontsentsuzkoa» izan zedin herri osoa inplikatu nahi zuela azpimarratu zuen, eta horretarako hutsetik abiatutako araudia lantzen hasi aurretik, ingenieritza enpresa batek 2024an egindako azterketa teknikoaren emaitza eta lehen proposamena gizarteratzeko bilera irekia egin zuten Itsas Etxean 2025eko abenduaren 16an. Izan ere, 2024ko udan hasi ziren zirkulazio handiena duten eremuetan konteo lanak egiten, eta 2025eko udan, TAO froga pilotuak egin zituzten Pasaia kalean, Soroeta-Berrin eta Amute auzoan, «eremu bakoitzaren problematika» ulertzeko.
Egindako diagnostikoaren arabera, Hondarribian 9.252 ibilgailu daude erroldatuta, eta urteko sasoiaren arabera kanpoko ibilgailuen presioa handia izan ohi da. Aldiz, espazio publikoan 3.574 aparkaleku besterik ez daude herrian. Hartara egoiliarrentzako lekuak zehazteko garaje eta aparkaleku pribatuak ere aintzat hartu dituzte azterketa teknikoan, baina Alde Zaharra eta Portua auzoetan inguruko eremuak osagarri behar dituztela argi geratu zen.
Aipatutako lehen bilera horren ondotik, 2025eko abenduaren 18tik 2026ko urtarrilaren 12ra bitartean aurretiazko kontsulta fasea ireki zuten, eta herritarrek 9 galdera besterik ez zituzten egin. Partaidetza saio hartan 70 lagunek parte hartu zuten, eta ondoren, otsailaren 25ean ospatutako Mugikortasun Mahaian 25 lagun bildu ziren. Geroago, balizko TAO eremuak hunkituko lituzketen hiru eremu nagusietan bilera sektorial bana egin zutela gogoratu du Urtizbereak. Zehazki, 2026ko martxoaren 10etik 12ra Amute-Mendelu, Portua-Alde Zaharra-Puntala eta Akartegin egindako saioetan, 64, 48 eta 54 lagunek parte hartu zuten hurrenez hurren.