Nafartar

Orion konstelazioko izar argitsuena da Rigel. Baita Yoni Salaberria goizuetarraren proiektu musikalaren izena. Mexikora eginiko bidaia batean izan zuen aukera Salaberriak musikarekin harreman estuago bat garatzeko. Bidaia hartako momentu ilun batean, musikak argitu baitzion bidea, izar batek egiten duen moduan. Lagun batek musika instrumentalak bidali zizkion, eta oinarri honen gainean, Yoni barreneko korapiloak askatzen joan zen. Gaur egun, Rig3l-en barne hausnarketa hauetara hurbildu gaitezke bere kantuak adituz. Musikaz gain, ilustrazioek eta animazioek osatzen dute Rig3l.

Rig3l - EZ GALDU (Bisualizerra)

Erkiziaren ustez, artearen helburuetako bat galderak egitea da eta ez afirmazioak bermatzea.  Izan ere dio garai batean bizi garela  non ulertzen dugun arteak afirmatzeko balio duela, eta ez galderak sortzeko. Hortaz, Xabier Erkiziaren artetik garatutako galdera anitzez hausnartzeko aukera izan dugu. Lesakarrak, adimenaren eta soinuaren bitartez, mundua jasotzeko eta hobeki ulertzeko duen gaitasuna ezagutu dugu.

Nahia Pagola beratarra Patroigintza eta Moda goi-mailako zikloa ikasten ari da buru-belarri. Joskintza adierazpen artistiko moduan ulerturik, Nahiaren estiloa guztiz irekia da. Estilo klasiko edo sinpleenetik estilo esajeratu batera pasatzeko gaitasuna dauka. Sortutakoa justifikazio baten baitan mantenduz. Horretaz gain,  joskintza funtsezko baloreekin lotu du elkarrizketan zehar Nahiak. Batik bat material onak erabiltzea, lan baldintza onak bermatzea edo kontsumoarekiko harreman sustengarri bat mantentzen saiatzea ditu helburu. 

https://www.instagram.com/nahiapagola_atelier/?hl=es

Euskaltzale apasionatu gisa aurkeztu du bere izatea Amaia Elizagoienek. Euskal kulturaren transmisioan parte hartu eta bihotz gehienetara heltzea da bere helburuetako bat. Lan honetan ipuina eta kontaketa izan ditu helduleku. Elkarrizketa honen bidez Amaiak munduarekiko daukan begirada zertxobait ezagutu dugu. 

https://ipuinkontalaria.eus/

Uxuri Etxegia antzerkilari eta artista sunbildarrarekin izan dugu gaurkoan tertulia. Antzerkiarekin lotutako kontuak izan ditugu hizpide bertzeak bertze. Mugak, aukerak, ikasketak, saiakerak…Hau guztia hiritik herrira bueltatzearen bizi esperientziarekin lotu dugu.

Barne diseinuaz, ilustrazioaz, altzarigintzaz, zurgintzaz eta bertze hainbertze bitxikeriz aritu gara Julia Artieda Vilarekin. Esparru guzti huen gakoak azaldu dizkigu beratarrak: barne diseinuko joera garaikideak, koloreen erabilera on baten aholkuak, bezeroekin harremantzeko moduak edo originaltasuna mantentzeko gorabeherak. 

Sareak: https://www.instagram.com/kiribil_/?hl=es

Ttikitan amatxiengandik eta naturaz inguraturik jaso zuen Ane Matxikotek sorkuntzarekiko grina. Gaur egun ere transmisio hau mantendu du. Bere lanean, naturaren, baserri inguruaren eta familiaren karga handia sumatu dezakegu.

https://www.instagram.com/ane.matx/?hl=es

Nerea de Diego iruindarrarekin Arte Garaikidea ulertzeko pausua eman dugu. Bere ibilbidean sortutako obrak oroituz, Ama Birjinaren iruditegi erlijioso herrikoi batekin egin dugu topo.

Irudia: No sacred place/ Objetos portátiles. Nerea de Diego. 2013

Gitarra eta biolinaren bitartez sartu zen  Maddi musikaren unibertsoan. Hari-instrumentu hauek lagun izanik sortu zituen lehen abestiak eta prozesu luze baten ostean, Amaitasuna diskan entzun ahal izan genituen. Laguntasuna, maitasunaren amaiera, eta heriotzaren inguruan hausnartu zuen batik bat. Horrela, Maddiren ideia, bizipen eta ikasketez aritu gara solasean, diskak urte bat bete duen honetan.

https://www.youtube.com/watch?v=NzdgHipbz-o&list=OLAK5uy_naGSa1x7magcFKOTgzxG_b28sqcE42MhI

Ideia edo emozio aunitz dagoen testuingurua irudi batean sartzeak badu zerbait alkimikoa Jone Tabernarentzat. Intentzio bat jartzen dio sormenari, ordago bat botaz misterioari, magiarekin jolasean. Bitxigintza eta ilustrazioaren bitartez sortzen du berak halako intentzio bat. Hala ere, ilustrazioa da bere lengoaia naturala. 

Gaurko emanaldian Joneren unibertsoa ezagutu dugu, bere obra beti dagoelako irekia, publikoak sorkuntza ariketa bat egin dezan, artea kolektibotasunean bizitzeko.

https://www.instagram.com/jonetaberna/?hl=es

Artea herritik eta herriarentzat sortzen den zerbait dela dio Irazokik. Sorkuntzak hartzen ahal duen formak ez du kezkatzen, zentzu eta espazio guztiekin bizitzen duelako berak. Adibidez, sukaldean.

Kozinatzea norbera eta norbait maitatzearen keinua den moduan, artea ere halakoxea da. Dena gertatzen ahal da momentu hortan. Maddik erabakitzen baitu zer eta nondik begiratu, zerri garrantzia eman. 

Maider Aizpuruarekin musika klasikoaren bitxikeriak ezagutu ditugu. Biolinaren sorrera, Mozarten bizipenak, Shostakovitchen konposizioa eta irlandar musika herrikoia izan ditugu hizpide bertzeak bertze. Oiasso Kameratako partaidea da Maider eta 20 urte inguru daramatza Berako Musika Eskolan biolina erakusten.

Irudigileen lana hausnartzea dela dio Asier Gogortzak, irudiari buruz eta begiradari buruz pentsatzea. Abiadura geldiezinean  gure momentu kuttunenak erretratatzeko aukera daukagu gaur egun, baina Gogortzak mundua pentsatzen du irudiaren bitartez. Berak dio irudia lengoaia bat dela, aunitz aldatzen ari dena, gizartearkin batera. Aldaketa honetan ez du konponbidea bilatzen, baizik eta lengoaiak eskaintzen dion buruhaustea.

http://asiergogortza.net/

2025 hontan Maiane Sanchezek Adour Bidasoa margo lehiaketan artista gaztearen saria irabazi du (Ezkutaketan) eta Le Printemps de Ducontenia margo lehiaketan lehen saria. Maianeren obra hobeto ezagutzeko aukera izan dugu solasaldi honetan. 

Instagram: https://www.instagram.com/maiane.sp/?hl=es

June Azpiroz igantziar ilustratzaile autodidakta dugu. Maitasunak, laguntasunak eta eguneroko detaile ttikiek inspiratzen dute June. Hezkuntza sistemaz, jamaikar musikaz edo animazioaz egin dugu hausnarketa. 

Instagram: https://www.instagram.com/kekono_/?hl=es

Iraia Gillenea beratarrak ttikitatik izan du lotura arte disziplina aunitzekin. Argazkilaritza ikasketak bukatuta, gaur egun buru-belarri dabil arlo artistiko hau jorratzen. Txoko ezezagunek, naturak, itsasoak, mendiak edo laguntasunak osatzen dute Iraiaren iruditegia.

Instagram: https://www.instagram.com/luleargazkiak/?hl=es