Urte eta erdiko lanen ondotik, azken ukituak besterik ez dira falta Oiasso museoaren atzean dagoen aztarnategian. Beira eta altzarizko eraikin ikusgarria da, pasabidez betea, azpian datzaten terma erromatarren aztarnak behatzeko egokitua. Bi miloi eta erdi pasako inbertsioa izan dute lanek, eta eraikinaz gain, “puntako teknologia erabiltzen duten” simulazioak ere izanen dira, termak nolakoak ziren irudikatzen laguntzeko.
Kontent agertu da Juanjo Jimenez Oiasso museoko zuzendaria, 2006an museoa ireki zenetik egiturak izan duen aldaketa handienaren atarian: “Aztarnategiak zalantzarik gabe museoaren eskaintza aberastuko du”. Izan ere, inaugurazioaren eta ate irekien etapa pasaturik, sarrera bakarrean museoa eta termak batera bisitatzen ahalko dira.
Jimenezek argi du ondare handia dela esku artean duena: “Erromatar garaiko aztarnategi arkeologiko bat ez da erraz topatzen Euskal Herrian, eta Irun erdigunean izango dugu guk”. Ama Xantalen ermitako aztarnekin eta Irugurutzetan hasi berri diren lanekin, zirkuitu ikusgarri eta erakargarria izanen du laster Irunek.
‘Salve, Irun’, ondarea guztien eskura egon dadin
Aste santuko eta udaberriko opor garaian antolatu dute aztarnategiaren irekiera, eta harekin batera beste hainbat jarduera ere. Hilaren 11n, ostiralez inaugurazio instituzionala izanen bada, larunbat eta igandean bisita gidatuak izanen dira museoan eta termetan nahi duen ororentzat.
Opor garaia probestuz, 6 eta 12 urte arteko haurrentzat jarduera andana izanen dira Oiasson. Apirilaren 15 eta 22an, termen ezagutza Arkeolab tailerrarekin uztartuko dute. Apirilaren 16, 23 eta 25ean berriz, termetan barna ibilbide bat antolatu dute, “termek zituzten gela ezberdinak puzzle batean bezala ezagutzen ahalko dituzte” Juanjo Jimenezek azaldu duenez. Hilaren 24an ‘Termak eta mosaikoak’ tailerrean Opus Spicatum deituriko mosaikoak ezagutzeko aukera izanen da.
Aztarnategiko bisita gidatuak ez dira lehen asteburuan bakarrik izanen, aste santu osoan zehar baita hurrengo asteburuetan ere luzatuko baitira, euskaraz zein gaztelaniaz.
