Hezkuntzan irakasleen %70 inguruk egin du greba eskualdean, eta osasun-langileen artean %30 ingurukoa izan da jarraipena. Goizeko pikete informatibo eta autokarabanen ondorioz, autolerroak sortu dira Amuten eta Jaitzubian eskualdetik Gipuzkoa aldera joateko, baina poliziak zirkulazioa bideratzeko esku-hartu du. Garraio publikoan %30eko gutxieneko zerbitzuak bermatu dituzte, baina autobus asko ia hutsik ibili dira. Goiza istilu handirik gabe pasa bada ere, higiezin-agentzien eta banketxeen kontrako pintaketa ugari egin dituzte, eta Lurraldebusek BI05 linea eten egin behar izan du Urdanibia plazan kale-ekintza baten ondorioz. Arratsaldean (18:00) Zubimuxuko biribilgunetik San Juan plazaraino manifestatzera deitu du Bidasoko Greba Batzordeak.

Hondarribiarren etorkizun energetikoa modu kolektiboan eraikitzeko aukera erreala izan dadin, herritarrek energia-komunitate bat sortzeko aukera emango duten hiru saio parte-hartzaile antolatu ditu Hondarribiko Udalak, azaroaren 18an eta abenduaren 10ean eta 16an. Saio guztiak Itsas Etxean egingo dituzte 18:00etan, eta helburua da, proiektuaren eredua, izena eta logotipoa adostea, eta etorkizunean herriko teilatuetan egindako instalazio fotovoltaiko bati esker, energia berriztagarria sortu, kudeatu eta komunitateko kideen artean partekatzeko aukera emango duen egitura berri bat eratzea.