Bere bizitza intelektuala eta artisitikoa ezagutzara emateko erakusketa intimoa antolatu dute Arma Plazan. Eta azaroan zehar, idazle, dramaturgo eta editorearen figura omentzeko "Torturaren zutoin beltza" liburuaren aurkezpena eta "El hijo unico de Guillermo Tell" irakurketa dramatizatua egingo dute. Hilaren 21ean, aldiz, azken agurra eta omenaldia prestatu dute senide eta lagunek Hondarribiko hilerrian, eta bere errautsek Saseta komandantearen eta José Bergamín idazlearen hilobien ondoan atseden hartuko dute.

Herriko hizkera balioan jarri eta erabilera berreskuratzeko ekimena bultzatu dute AEKk eta Blagan euskara elkarteak Hondarribiko Udalaren eskutik. Aurrekontu parte-hartzaileetatik eratorritako proiektu honekin, apaingarri bezala baino, eguneroko hizkuntza ez formalean herriko hizkeraren erabilera sustatu nahi dute, ezagutzara eman eta belaunaldi berriek galdu duten ahozko transmisioa indartuz. Zirikatze kanpaina batekin hasi dira @guazemizia Instagram profilean, eta urtarrilaren 30ean antolatutako ttoparaz gain, abenduko Euskal Azoka herriko hizkeraren bueltan ardaztuko dute.