Espainiako Estatuak Hondartza eremuko jabetza udalari emateko epe luzeko prozedura kudeatzen ari diren bitartean, futbol zelaia, kiroldegiko obrak eta pump truck zein skate parkea berritzeko baimenak lortu ditu Hondarribiko Udalak aldi berean. «Ezin genuen gehiago itxaron», dio alkateak, eta Eusko Jaurlaritzarekin paraleloan landu duten 25 urterako lagapena berritu dute. Horri esker, lurren behin betiko esku-aldaketa lortu bitartean, udalak inbertsioak egin ahal izango ditu bertan. Skate parkearena izango da aurrenekoa, urtea amaitu baino lehen hasiko dituzte lanak 500.000 euroko inbertsioarekin.

Udalerri Euskaldunen Mankomunitateak (UEMA) joan den apirilean aurkeztu zuen ESNATU dinamikarekin bat egitea erabaki du Hondarribiko Udalak. Horren arabera, euskararen erabilera herrian sustatzeko hainbat konpromiso hartu ditu. Kontratazio publiko guztietan hizkuntza baldintzak ezartzea, haur eta gazteen aisialdia euskara hutsean programatzea, edota herrira etorri berriak diren pertsonak euskarara erakartzeko bitartekoak areagotzea, besteak beste.