Herriko ikastetxeetako patioak behin baino gehiagotan zikinkeriaz bete dituzte azken asteetan eta kanpoko materiala hondatua agertu da. Egoeraren aurrean espazio horiek ixtea erabaki dute egoerak etenik ez duela ikusita. Lesakako Udalak elkarretaratzera deitu zituen atzo herritarrak, kaltetuen artean dauden Magala Haur Eskola, Irain Herri Eskola, Tantirumairu Ikastola eta Beti Gazte elkartearekin batera. 

Euskarabideak iaz antolatu zuen lehen aldiz adinekoei zuzendutako bertso programa. Adinekoen egoitzetan, eguneko zentroetan edota elkarteetan sei bertso saio egin zituzten eta balorazio positiboak bilduta, aurten bigarren edizioa martxan dute dagoeneko. Urriaren 2an egin zuten lehen saioa Beran eta ondotik, Lekunberrin, Altsasun, Betelun, Iruñean, Lesakan eta Elizondon eginen dira. Saioen helburua adinekoen ongizatea bermatzea da, euskal kulturaren transmisioaren bitartez, memoria landu eta komunitatea sortzeko.