Estatuko lagapena 2020ean iraungi zenetik blokatuak dauden Hondartza Kirol Eremuko lurrak Hondarribiko Udalaren jabetzara pasatzeko espedientearen hasiera «albiste garrantzitsua» dela azpimarratu du Abotsanitzek. Haatik, aurrekariak ikusita «tentuz eta zintzotasunez jokatzeko» eskatu die EAJri eta PSEri, «oraindik eremua udalaren eskuetan ez dagoelako, eta hilabete luzez itxaron beharko dugulako hori gauzatzeko».

Terrazen ordenantza garatzen hasi aurretik lanketa sakona egin du Hondarribiko Udalak inplikatutako kolektiboekin. «Orain arte asko arautu da ahoz modu indibidualean, eta horrek ekarri du desoreka», dio alkateordeak. Atzo ireki zuten herritarrek iritzia emateko bi asteko epea, lehentasuna «ostalari eta herritarren interesak adostasun mailarik handienarekin uztartzea» delako.