Azken urteetan bezala, urriaren 31n Gau Beltza ospatuko da Euskal Herriko zenbait herritan. Bortzirietan ere, horrela eginen dute herri guzietan, egun honi lotuta dagoen euskal ohitura berreskuratzeko asmoz. Lesakan eta Beran dagoeneko prest dituzte ospakizunerako egitarauak, hezkuntza zentroetako guraso elkarteek elkarrekin antolatuak. Ipuin kontalariak, tailerrak, berenduak eta errituak izanen dituzte herriko haur zein helduek urriaren 31an.

Lesakako Liburutegiak bihar, urriaren 24an, beteko ditu hamar urte Harriondoa Kultur Etxera lekualdatu zela. Horren harira, eta Liburutegien Nazioarteko Eguna ospatzeko, Liburutegiak eta Lesakako Udalak elkarlanean urte osoko ekitaldiz betetako programa ondu dute. Tartean, gaur, 12:00etatik 20:00etara, ospatuko den I. Irakurraldi Jarraitua. Goizez, haurrek parte hartuko dute; arratsaldez berriz, herriko idazleak ariko dira beraien lanak ahoz goiti leitzen.