Dunboa, Toki Alai eta Belaskoenea ikastetxe publikoetan "Ongi Etorri Eskolara" egitasmo inklusiboarekin garatzen ari diren egitasmoaren baitan, “Irungo baliabideak ezagutzen” bilera informatiboa egin dute Palmera Montero gunean. Iritsi berriak diren familien errotze prozesuan lagungarri izan daitezkeen Esku Hartze Komunitarioko, Haurtxokoetako, Gaztelekuetako, AEK, Kera, Adiskidetuak, Bizi Irun elkarteetako eta Txingudiko Elkarte Feministako ordezkariek parte hartu zuten bileran. 

Zirkulazioaren norantza eta erabiltzaileen nasa aldaketa urtarrilaren 28an indarrean sartzeko asmoa iragarri zuen Euskal Trenbide Sareak (ETS), baina arrazoi operatiboengatik atzeratu zuten. Azkenean bihar, otsailak 11rekin egingo dute Topoaren nasa aldaketa. 1983az geroztik Hendaia-Amara arteko zerbitzua gainerako Euskotren zerbitzuen kontrako noranzkoan ibiltzen da. Baina Donostiako lur azpiko hiru geltoki berriak martxan jartzen diren unean zerbitzu guztiek bat egin dezaten, Hendaia-Pasaia artean erabiltzaileek ohiko nasaren kontrakotik sartu beharko dute trenera hemendik aurrera.