Aiako Harria parke naturaleko Lapurriturriko Informazio Guneak urriaren 31n itxi zuen denboraldia. 2024ko datuekin alderatuta %7 hobetu du bisitari kopurua. Baina ateak zabalik izan dituen 52 egunetan 354 bisita jaso ditu. Iaz 54 egunetan jasotako 331 bisitarien aldean hobekuntza bat bada ere, 2019an 1.625 bisitarirekin marka guztiak apurtu zituenetik beherakada nabarmena izan da. 

Hotelen okupazioa %95ekoa izan da udan, eta atzerritarren kopuruak %45 egin du gora Irunen. Historia, kultura, gastronomia eta naturaren erreklamuei esker, bildutako datuek adierazten dute lo egiteko ostatu hartzen dutenek, batez bestean bi gau egin dituztela Irunen. Oiasso museoak %40 emendatu ditu bisitak terma erromatarrei esker, baina Bidasoa ibaia, Plaiaundi, Aiako Harria eta 45 hitzorduko kultur agendak ere interesa piztu dute.