Herrian ospatu zen azken Euskal Jaiaren mendeurrena ospatzeko dantza, kanta, bertsoa, literatura, erakusketak, bisitak eta mahai-inguruak prestatu ditu Hondarribiko Udalak herriko hainbat eragilerekin elkarlanean. Antton Abadiak sortutako loraldia gogoan hartzeko, 'Anton Abadia Zikloa' proposatzen dute, «izan garena, garena eta izan nahi dugunaz hausnartzeko». Programazio oparoa ondu dute abenduaren 17ra arte. 

Bidasoko AEK-k hika ikasteko aukera eskaintzen du. Hasiberriei zuzendutako ikastaroak dira, eta astean bitan elkartzen dira: astearte eta ostegunetan, 18:00etatik 19:30era. Oraindik izena emateko epea zabalik dago, eta parte-hartzaileek euskararen tratamendu informala praktikan jartzeko aukera paregabea dute. Beñat Alzaga, Irungo AEK euskaltegiko koordinatzailearekin hitz egin dugu.