Joan den urtarrilean Euskaraz Barra Barra programa abian jarri zuen Irungo Udaleko Euskara Zerbitzuak, eta dagoeneko hiriko 87 denda eta ostatuk euskaraz egitera gonbidatzen dute. Aste honetan, aldiz, 176.805 euroko kontratua onartu dute Kalean Bai programa lau urtez garatzeko. 2002an abiatutako ekimena eguneratzeko eta indartzeko helburua du udalak, haur eta gazteen eskolaz kanpoko denboran euskararen erabilera suspertzeko.

Aurten Zinema Euskaraz programa bikoiztu egingo du Irungo Udalak haurrentzako 20 proiekziorekin, eta 240 eserleku dituen Ocine Mendibil areto handian. Eta aurreneko aldiz, oraindik zehaztu gabeko kartelerarekin helduentzako 5 filma programatuko dituzte euskaraz eta dohainik.